Tŭ ư klei iêo jak mơ̆ng Khua knŭk kna Lê Minh Hưng, Khua knŭk kna Cộng hòa Poland Donald Tusk hriê čhưn klă sĭt Việt Nam mơ̆ng hruê 24/26/10/2026. Hruê 26/10, ti Hà Nội, leh knăm tŭ drông leh anăn bi trông, Khua knŭk kna Lê Minh Hưng leh anăn Khua knŭk kna Poland Donald Tusk gĭt gai leh klei bi kƀĭn phung čih klei mrâo mbĭt, klă sĭt mđĭ klei bi mjĕ dua ala čar jing ƀĭng hgŭm phŭn. Bruă mđĭ klei bi mjĕ bi êdah klei gĭr mơ̆ng khua gĭt gai dua ala čar hlăm bruă mđĭ klei đăo knang kđi čar, pŏk mlar klei bi hgŭm klă sĭt leh anăn ba yua tŭ dưn klei găl mơ̆ng grăp tĭng. Dua ala čar srăng lŏ dơ̆ng mtrŭt mđĭ klei bi trông êpul gưl dlông, mđĭ klei bi hgŭm plah wah dŭm anôk bruă, êpul êya leh anăn alŭ wăl; mbĭt anăn pŏk mlar klei bi hgŭm ti dŭm klei bi kƀĭn lu tĭng, boh nik Êpul hgŭm lu ala čar.

Hlăm bruă duh mkra, mnia mblei leh anăn duh bi liê, Việt Nam leh anăn Poland mđing truh mtrŭt mđĭ klei bi hgŭm hlăm tur knơ̆ng Klei kuôl kă mnia mblei êngiê Việt Nam - Êpul hgŭm Ơrôp, mjing klei găl kơ anôk bruă duh mkra dua ala čar. Dŭm bruă mâo lu klei găl msĕ si bruă lŏ hma, bruă tuh tia mkra mjing, pui kmlă doh, bi mlih mrô, bruă êlan klông dŭ mdiăng, êa drao gŭn leh anăn kdrăp mdrao mgŭn. Dua tĭng ăt mđing mtrŭt mđĭ hdră bi hgŭm bruă mtô bi hriăm, kreh knhâo, dhar kreh, hiu čhưn ênguê leh anăn mjĕ êrô mnuih ƀuôn sang; mbĭt anăn mđĭ hdră bi hgŭm hlăm dŭm bruă tar rŏng lăn, krĭng wăl hluê si klei bhiăn tar rŏng lăn leh anăn Hdră mtrŭn Êpul hgŭm lu ala čar.