Klah čŭn klei bi kƀĭn, Khua gĭt gai Đảng, Khua lăn čar Tô Lâm tĭng dlăng wưng êgao, bruă hŏng tač êngao leh anăn ñŭ kma hŏng ala tač êngao mâo lu boh tŭ dưn jăk, mâo klei bi mlih kơ hnơ̆ng tŭ jăk klei đru kčĕ, bi hgŭm leh anăn mkŏ mjing hluê ngă, đru rơ̆ng wăl anôk êđăp ênang, hơĭt kjăp, pŏk mlar klei bi hgŭm leh anăn mjing thiăm ai dưi mđĭ kyar lăn čar. Bruă hŏng tač êngao hlăm dŭm êlan, dŭm mta bruă dưi pŏk ngă mđrăm mbĭt, bruă tui ksiêm dŭm klei ƀuăn rơ̆ng, klei kuôl kă ƀrư̆ ƀrư̆ bi mlih mơ̆ng ksiêm yap hnơ̆ng truh kơ tĭng dlăng boh tŭ dưn, bi klă bruă klam.

Khua gĭt gai Đảng, Khua lăn čar mtă kơ dŭm Anôk bruă ngă bruă klam lŏ dơ̆ng mđĭ lar bruă klam đru kčĕ, ktrâo lač čiăng lŏ dơ̆ng mđĭ hnơ̆ng tŭ jăk, klei hơĭt kjăp mơ̆ng dŭm boh tŭ dưn mâo leh. Dŭm anôk bruă djŏ tuôm brei mđing pŏk ngă dŭm bruă klam phŭn hlăm dŭm mlan knhal jih thŭn, mđĭ boh tŭ hdră mă bruă hŏng tač êngao, bi mlih dŭm klei ƀuăn rơ̆ng jing hdră bruă, mnơ̆ng dhơ̆ng leh anăn anôk mnia mblei klă sĭt đru klă sĭt kơ klei hdĭp mnuih ƀuôn sang; mprăp jăk kơ bruă klam kơ anăp, hlăm anăn mâo APEC 2027.