Mkra mlih Hdră bhiăn gang mkhư̆, truih mdjiê klei pui ƀơ̆ng: Đăm jao bruă ôh êjai kƀah ai dưi
Thứ ba, 08:57, 27/10/2026
Y-Ƀel Êban/ VOV Tây Nguyên
Y-Ƀel Êban/ VOV Tây Nguyên
VOV.Êđê- Lŏ dơ̆ng hdră Klei bi kƀĭn tal 2, Anôk bruă kƀĭn ala gưl 16, aguah 26/10, Anôk bruă kƀĭn ala bi trông hlăm êpul kơ dŭm hdră bhiăn djŏ tuôm kơ bruă kriê dlăng phao ktuang, mnơ̆ng yua ƀơ̆ng pui, gang mkhư̆, truih mdjiê klei pui ƀơ̆ng, đru dŏng mnuih mâo klei truh leh anăn răng mgang anôk bruă yuôm bhăn kơ klei êđăp ênang ala čar.
Đru mguôp klei blŭ kơ dŭm hdră bhiăn, Khua gĭt gai Đảng, Khua lăn čar Tô Lâm mñă klă klei čiăng bi klă klei găl, ai dưi hluê ngă, hdră đru kčĕ leh anăn bruă klam bi hgŭm plah wah dŭm anôk bruă. Bruă jao bruă klam brei rơ̆ng djăp klei găl pŏk ngă, kñăm thâo ƀuh hnưm klei huĭ hyưt, gang mkhư̆ hmao klei truh leh anăn răng mgang mnuih ƀuôn sang jăk hĭn.
Kơ bruă răng mgang anôk bruă yuôm bhăn djŏ tuôm kơ klei êđăp ênang ala čar, Khua gĭt gai Đảng, Khua lăn čar Tô Lâm mtă brei bi mklă djŏ anôk bruă čiăng răng mgang, hnơ̆ng răng mgang leh anăn bruă klam hluê ngă. Mbĭt anăn, brei thiăm mbŏ hdră gang mkhư̆ klei ngă măk ƀai, răng mgang hrăm mbĭt anôk bruă, klei čih pioh leh anăn kdrăp kriê dlăng.
Viết bình luận