Hlăm anăn, năng mđing jing Hdră mtrŭn kơ Hdră kčah mđĭ kyar bruă duh mkra - ala ƀuôn, rơ̆ng klei êđăp ênang čar Dak Lak wưng thŭn 2026-2030. Hdră mtrŭn bi klă mta kñăm mkŏ mjing Dak Lak jing čar đĭ kyar ktang mơ̆ng kluôm ala; jing anôk bruă duh mkra mtah, logistics, bruă mdrao mgŭn, mtô bi hriăm, hiu čhưn ênguê, dhar kreh - mjuăt asei mlei leh anăn kreh knhâo - kdrăp mrâo mơ̆ng krĭng Dap mnai êa krông Cửu Long leh anăn Lăn Dap Kngư.

Hdră mtrŭn ăt bi mklă 5 hdră êlan kdlưn hĭn, mâo bi leh klei bhiăn leh anăn mkŏ mjing bruă knŭk kna mrâo mrang; iêo jak tŭ dưn dŭm ai dưi mđĭ kyar anôk bruă nah gŭ; mă klei kreh knhâo - kdrăp mrâo, mlih mrâo mbruă leh anăn mlih mrô jing boh kdrŭt đĭ kyar; mđĭ kyar Wăl duh mkra Dhŭng Phú Yên, ƀuôn prŏng Ƀuôn Ama Thuôt leh anăn dŭm ktuê êlan duh mkra jing dŭm anôk đĭ kyar; mtrŭt mđĭ ktang bruă duh mkra êngao knŭk kna, bruă duh mkra mtah, bruă duh mkra mrô, bruă duh mkra êa ksĭ leh anăn bruă tuh tia mkra mjing êlam.