Ƀuôn hgŭm Hoài Nhơn Bắc jing alŭ wăl êdah êdi mơ̆ng čar Gia Lai hlăm bruă mkŏ mjing hdră bruă jih jang mnuih ƀuôn sang răng mgang klei êđăp eneang Lăn čar hŏng lu gru hmô tŭ dưn msĕ si “Hâo hưn jăk - bi mgrăng thâo, lui klei amâo thâo bi djŏ ”, “Êpul bruă phung mniê gang mkhư̆ klei mlpư ti internet”. 6 mlan akŏ thŭn 2026, mnuih ƀuôn sang alŭ wăl mkăp brei leh 42 klei hưn yuôm bhăn, đru kơ êpul ngă bruă gang mkhư̆, bi kdơ̆ng hŏng phung ngă soh leh anăn msir lu boh klei mơ̆ng nah gŭ. Trần Hữu Thảo, Khua dlăng bruă Đảng, khua Êpul gơ̆ng bruă ƀuôn sang ƀuôn hgŭm Hoài Nhơn Bắc, čar Gia Lai brei thâo, răng mgang klei êđăp ênang ti alŭ wăl jing bruă klam mơ̆ng bruă kđi čar, mơ̆ng grăp čô mnuih ƀuôn sang.

“Răng mgang klei êđăp ênang hơĭt kơh bruă duh mkra đĭ kyar, klei hdĭp mơ̆ng grăp gŏ sang dưi hơuh mđao, yâo mơak. Kyuanăn, răng mgang klei êđăp ênang amâo djŏ knŏng bruă hjăn mơ̆ng êpul kahan ksiêm ƀiădah jing bruă klam leh anăn klei tŭ dưn mơ̆ng grăp čô mnuih ƀuôn sang drei.”

Hlăm hruê knăm, Đại tướng Trịnh Văn Quyết pah mni dŭm boh tŭ dưn mâo bruă Đảng, Bruă sang čư̆ êa leh anăn mnuih ƀuôn sang ƀuôn hgŭm Hoài Nhơn Bắc, čar Gia Lai dưi mâo leh hlăm hdră bruă jih jang mnuih ƀuôn sang răng mgang klei êđăp ênang Lăn čar. Đại tướng mñă klă, răng mgang klei êđăp ênang Lăn čar jing bruă mơ̆ng jih jang mnuih ƀuôn sang ti gŭ klei gĭt gai mơ̆ng Đảng, hlăm anăn êpul kahan ksiêm yang ƀuôn mâo bruă klam kmeh gơ̆ng. Čiăng răng mgang klei êđăp ênang mơ̆ng hnưm, mơ̆ng kbưi srăng krơ̆ng mơ̆ng phŭn, phŭn jing ai tiê mnuih ƀuôn sang. Hdră bruă jih jang mnuih ƀuôn sang răng mgang klei êđăp ênang lăn čar čiăng đĭ kyar klă klơ̆ng čiăng nao mbĭt hŏng bruă kriê dlăng klei hdĭp yang ƀuôn, rơ̆ng kơ grăp čô mnuih ƀuôn sang dưi dưn boh tŭ dưn klei đĭ kyar.

 Khua Anôk bruă hâo hưn mtô mblang gưl dlông mtă kơ Gia Lai lŏ dơ̆ng ksiêm dlăng leh anăn pŏk ngă boh tŭ hdră mtrŭn mơ̆ng Gưl dlông kơ klei mkŏ mjing ala ƀuôn kjăp, êđăp ênang, jăk siam leh anăn Hdră bruă kluôm ala čar; mlih mrâo bruă hâo hưn mtô mblang, mđĭ ai bi kdơ̆ng hŏng klei hâo hưn soh hlăm êlan ineternet; mđĭ bi hgŭm plah wah kahan ksiêm, êpul kahan, Mặt trận čar kwar leh anăn dŭm êpul hgŭm; mkŏ mjing êpul kahan ksiêm giăm mnuih ƀuôn sang, mpŭ kơ mnuih ƀuôn sang, thâo săng mnuih ƀuôn sang, kyua mnuih ƀuôn sang ngă bruă.

Đại tướng Trịnh Văn Quyết ăt mtă kơ čar Gia Lai ksiêm ruah ƀuôn hgŭm Hoài Nhơn Bắc  jing alŭ wăl lông ngă gru hmô “ƀuôn hgŭm yang ƀuôn ngă phŭn”:

“Kâo mtă kơ čar Gia Lai ksiêm dlăng hrŏng ruah ƀuôn hgŭm Hoài Nhơn Bắc jing sa hlăm dŭm alŭ wăl lông ngă gru hmô ƀuôn hgŭm yang ƀuôn ngă  phŭn  mơ̆ng tur knơ̆ng kjăp, êđăp ênang, jăk siam, mđĭ kyar  hlue ai tiê Hdră mtru’n mrô 18. Drei pŏk ngă grăp knhuang ƀiădah ngă sĭt, ngă kjăp leh anăn mâo mnơ̆ng dhơ̆ng klă klơ̆ng čiăng lŏ dơ̆ng bi lar.”