Truh kơ ară anei, kluôm čar Gia Lai mâo 517 mrô krĭng pla mjing, hŏng ênhă êbeh 13.500 ha. Hlăm anăn, ênhă mkăp kơ bruă ba čhĭ kơ ala tač êngao êbeh 12.700 ha. Mbĭt hŏng anăn, alŭ wăl ăt mâo êbeh 60 mrô anôk đŭng hruh mkăp kơ bruă ba čhĭ kơ ala tač êngao hŏng hnơ̆ng hlăm brô 3.600–3.800 ton boh mtah grăp hruê. Čiăng mkăp brei mrô knăl krĭng pla mjing, čar Gia Lai hrui mă leh klei hâo hưn hlăm brô 7.350 ha kphê mơ̆ng êbeh 5.200 gŏ êsei leh anăn giăm 970 ha boh durian mơ̆ng 712 gŏ êsei.

Čiăng mtrŭt mđĭ hnơ̆ng mkăp brei mrô knăl krĭng pla mjing hlăm wưng kơ anăp, Knơ̆ng bruă lŏ hma leh anăn wăl hdĭp mda čar Gia Lai lŏ dơ̆ng hluê ngă hluê hdră mđĭ lar, mđing tal êlâo anôk mâo klei hâo hưn kơ lăn ala djăp ênŭm, ksiêm dlăng bi leh dŭm krĭng ênhă điêt leh anăn thiăm mbŏ grăp kdrêč ti alŭ wăl mâo ênhă prŏng, klei hâo hưn kơ lăn ala dleh dlan.