Ti anôk bi kƀĭn trông čhai hŏng phung êdam êra thŭn 2026 mrâo êgao, Khua knơ̆ng bruă sang čư̆ êa čar Gia Lai Phạm Anh Tuấn pioh leh klei mđing uêñ kơ dŭm klei akâo klă klơ̆ng kơ klei mphŭn čô̆ kơ bruă, mlih mrâo hŏng klei mbruă lehanăn mjing bruă mă. Phung êdam êra akâo iêo jak mnuih mă bruă kdrăp mrâo hâo hưn, mjing bruă mă ti anôk pô, đru mphŭn čô̆ kơ bruă, mđĭ kyar bruă hiu čhưn ênguê leh anăn mlih mrô hlăm bruă lŏ hma. năng mđing, amai Trần Thị Bé, Khua knơ̆ng bruă duh mkra mnia mblei Trần Lâm Gia Phát, akâo ba yua dŭm anôk bruă knŭk kna êbeh leh hdră mkŏ dăp čiăng mkŏ mjing đang pla mjing mphŭn čô̆ kơ bruă mlih mrâo hŏng klei mbruă.

“Klei akâo kơ čar mkŏ mjing gru hmô đang pla mjing mphŭn čô̆ kơ bruă mlih mrâo hŏng klei mbruă. Ară anei, ti dŭm anôk bruă knŭk kna ti dŭm anôk phŭn dôk êbeh lu đei, hlăk êjai mâo dŭm anôk bruă čiăng pŏk ngă đang pla mjing brei nao mưn anôk ala. Kâo hmăng hmưi dưi nao hgŭm hlăm dŭm anôk msĕ snăn čiăng kơ hmei mâo klei găl pŏk ngă dŭm đang pla mjing, lehanăn yuôm bhăn mâo dŭm keh prăk đru leh mphŭn čô̆ kơ bruă čiăng dưi đru kơ dŭm čô hđeh êrĭt êrin dưi găn klei dleh dlan.”

Mơ̆ng klei akâo anei, Khua knơ̆ng bruă sang čư̆ êa čar Phạm Anh Tuấn bi mklă bruă sang čư̆ êa srăng mjing klei găl čiăng kơ phung êdam êra hưn mdah leh anăn pŏk ngă klei mĭn.

“Kâo dôk tinei mprăp mâo wăl anôk čiăng kơ diih hưn mdah klei mĭn. Hmei srăng iêo djŏ phung duh mkra arăng čiăng. Arăng ƀuh jăk, arăng đru diih mtam. Hmei ăt srăng mâo hdră êlan đru kơ pô duh mkra anăn čiăng đru diih. Ară anei ya anôk bruă duh mkra ăt pioh ai dưi kơ klei mlih mrâo mbruă leh. Brei diih jhŏng ngă hŏng ai tiê thâo mpŭ, duh myơr, đua klam”.

Ai tiê bruă sang čư̆ êa hrăm mbĭt ăt dưi bi êdah hlăm kdrêč "Mnuih ƀuôn sang, anôk bruă duh mkra êmuh - Bruă sang čư̆ êa čar Gia Lai wĭt lač", mphŭn mơ̆ng mlan 8/2026, mơ̆ng Adŭ bruă Knơ̆ng bruă sang čư̆ êa čar bi hgŭm hŏng Sang mđung asăp blŭ leh anăn mđung rup Gia Lai hluê ngă. Hluê anăn, mnuih ƀuôn sang, anôk bruă duh mkra dưi mơĭt klei êmuh kơ hdră êlan, hdră mtrŭn, wăl anôk duh bi liê lehanăn klei kpăk hlăm hdră ngă bruă mơ̆ng čar. Mlan 8, mta phŭn mđing kơ lăn ala, klei čiu hnô, ruh mgaih anôk ala leh anăn mđĭ kyar bruă duh mkra êngao knŭk kna. Dŭm mlan kơ anăp srăng pŏk mlar truh kơ klei mlih mrâo bruă knŭk kna, mlih mrô, bruă lŏ hma kdrăp mrâo mrang, AI, klei hdĭp yang ƀuôn, bruă mdrao mgŭn leh anăn mtô bi hriăm. Lê Dũng Linh, Khua Anôk bruă ngă hră mơar knŭk kna čar Gia Lai brei thâo:

“Dŭm klei êmuh djŏ hŏng klei dưi tŭ mă, jing amâo djŏ ôh kơ bruă djŏ tuôm hŏng klei kčŭt hưn, snăn jih jang klei dleh dlan, klei gun kpăk mơ̆ng mnuih ƀuôn sang, knơ̆ng bruă dưi tŭ mă sơăi. Mnuih ƀuôn sang, knơ̆ng bruă mơĭt, hmei srăng tŭ mă, ba kơ anôk bruă djŏ tuôm wĭt lač. Anôk bruă anăn brei mghaih msir mtam.”

Ti Gia Lai, mđing hmư̆ mnuih ƀuôn sang amâo djŏ knŏng mdei ti klei blŭ hrăm, ƀiădah brei dưi bi êdah hŏng dŭm bruă ngă klă klơ̆ng. Mơ̆ng ruh mgaih sa hră mơar, msir mghaih sa klei gun kpăk truh kơ tui ksiêm sa klei akâo truh kơ jih, anăn jing hdră bruă sang čư̆ êa jĕ giăm mnuih ƀuôn sang, hrăm mbĭt hŏng mnuih ƀuôn sang leh anăn anôk bruă duh mkra. Êjai klei blŭ mơ̆ng boh sĭt dưi wĭt lač hŏng bruă ngă, klei kbưi plah wah bruă sang čư̆ êa leh anăn mnuih ƀuôn sang Gia Lai srăng ƀrư̆ hruê ƀrư̆ dưi bi hrŏ, mjing thiăm klei đăo knang leh anăn boh kdrŭt kơ klei đĭ kyar.