Sa hlăm dŭm mta phŭn ngă kơ hdră duh bi liê knŭk kna ti čar Gia Lai mâo boh tŭ dưn ƀiă jing lu hdră bruă phŭn dôk êmưt. Hlăm anăn mâo Hdră bruă Sang hră knŭk kna čiêm rông hđeh mnuih djuê ƀiă mơ̆ng gưl sa truh kơ gưl tlâo ti 7 să knông lăn, Hdră bruă mkra êlan êdeh phiơr mrô 2 ti Tač êdeh phiơr Phù Cát leh anăn Hdră bruă mkra mđĭ Sang tuôr Čam Dương Long. Năng mđing, êlan dơ̆ng pral Quy Nhơn - Pleiku, hdră bruă mâo ênoh prăk lu leh anăn dưi bi mklă jing sa hlăm dŭm boh kdrŭt đĭ kyar hdră bruă mơ̆ng čar, ăt ka dưi ruh mgaih anôk ala ti lu krĭng kyua êlan găn lăn dliê prŏng. Nguyễn Tự Công Hoàng, kiăng khua knơ̆ng bruă sang čư̆ êa čar Gia Lai, kiă kriê dŭm bruă duh bi liê rŭ mdơ̆ng, brei thâo:

 "Klei gun kpăk jing Knơ̆ng bruă lŏ hma leh anăn wăl hdĭp mda brei mghaih msir bi jih klei lăn dliê. Klei anei snăn mâo 8 mlan hŏng anei Anôk bruă kriê dlăng dliê kmrơ̆ng amâo mâo dưi ngă ôh, grăp hruê kăm bi kƀĭn ăt lač nanao. Kdrêč 2 (Hdră bruă êlan dơ̆ng pral Quy Nhơn- Pleiku) lu jing gun kpăk lăn dliê."

Amâo djŏ knŏng kpăk hŏng hdră bhiăn, anôk ala, hnơ̆ng brei čan duh bi liê bruă knŭk kna ti Gia Lai lŏ hmăi mơ̆ng dŭm klei soh hlăm hdră mkŏ mjing hluê ngă. Knơ̆ng bruă sang čư̆ êa čar Gia Lai bi klă, ti lu anôk bruă kriê dlăng mâo klei ngă bruă hŏng kdrăp mă bruă, ñĕ đuĕ amâo dah lŏ mđĭ mđăl klei đua klam. Tơdah hră mơar mâo klei kpăk gun, hrô kơ čŏng pô bi hgŭm duah hdră ruh mgaih, mâo đa đa lŏ wĭt brei hră mơar, ngă kơ hruê mmông msir mgaih sui.

Khua knơ̆ng bruă sang čư̆ êa čar Gia Lai Phạm Anh Tuấn mtă kơ dŭm anôk bruă, alŭ wăl bi kjăp klei bhiăn, hdră bhiăn; mghaih msir mtam hdră ngă bruă leh anăn hluê ngă kjăp hdră êlan "6 klă mngač". Phạm Anh Tuấn brei thâo, Knơ̆ng bruă sang čư̆ êa čar Gia Lai mkŏ mjing leh hdră êlan klă klơ̆ng, mtă kơ dŭm anôk bruă, alŭ wăl hluê ngă kjăp čiăng bi leh hdră duh bi liê knŭk kna 100% ti knhal jih thŭn.

"Êbeh 30 hnơ̆ng čuăn mơ̆ng dŭm hdră ala čar kñăm, khua gĭt gai dŭm anôk bruă brei gĭt gai djŏ. Brei gĭt gai si srăng ngă čiăng kơ dŭm phŭn prăk mâo leh, čar tĭng amâodah să tĭng brei tĭng jih. Hlăm anăn, brei bi liê hnưm êlan dơ̆ng pral Quy Nhơn - Pleiku leh anăn hdră sang hră ti knông lăn. Kơ klei bi liê ngăn prăk knŭk kna, kâo mtă brei mđing rơ̆ng 100%..