Truh kơ ară anei, Gia Lai pŏk ngă leh truh 91/110 hdră bruă phŭn pui kmlă hŏng hnơ̆ng ngă bruă giăm 5.000 MW, bi knar giăm 90% klei ngă bruă dưi kah mbha. Hlăm mmông mă bruă, Knơ̆ng bruă sang čư̆ êa čar Gia Lai akâo kơ Phŭn bruă tuh tia mnia blei ksiêm dlăng mđĭ hnơ̆ng pui kmlă êran hŏng ai angĭn leh anăn pui kmlă êran hŏng pil yang hruê djŏ guôp hŏng klei găl alŭ wăl; hnưm bi mklă klei kčah mtrŭn ênoh bi liê pui kmlă thŭn 2026; mtrŭt bi pral duh bi liê dŭm bruă mkŏ mkra êlan pui kmlă; ruh mtlaih klei gun kpăk čiăng kơ dua hdră pui kmlă êran hŏng ai angĭn Chơ Long leh anăn Yang Trung hnưm dưi tŭ yap ba yua hlăm bruă mnia mblei, mbĭt anăn mâo hdră msir mkhư̆ bruă bi hrŏ hnơ̆ng pui kmlă mơ̆ng dŭm sang mkra mjing pui kmlă.

Blŭ hrăm hlăm mmông mă bruă, khua gĭt gai Phŭn bruă tuh tia mnia blei bi mni kơ boh tŭ pŏk ngă Hdră čuăl mkă pui kmlă VIII mơ̆ng Gia Lai, mbĭt anăn mtă kơ alŭ wăl lŏ dơ̆ng ksiêm dlăng dŭm hdră bruă, mtrŭt bi pral klei ngă hră mơar duh bi liê, ruh mgaih anôk ala, bi mguôp kjăp hŏng dŭm anôk bruă mơ̆ng phŭn bruă leh anăn dhar bruă pui kmlă čiăng hmao ruh mgaih dŭm klei dleh dlan, rơ̆ng hnơ̆ng dŭm hdră bruă phŭn leh anăn êlan klei pui kmlă hluê si klei čuăl mkă, đru rơ̆ng djăp pui kmlă ala čar.