Amai Đinh Thị Trang (25 thŭn), ti alŭ Nước Vuông, să Sơn Tây Thượng tuôm ngă bruă lŏ hma ti gŏ sang. Mơ̆ng leh mŭt mă bruă ti Êpul hgŭm bruă Lŏ hma dliê kmrơ̆ng leh anăn Mnia mblei Sơn Bua (Êpul hgŭm bruă Sơn Bua), să Sơn Tây Thượng, čar Quảng Ngãi, amai mphŭn hriăm hdră ba yua kdrăp masin, mưng hŏng hdră mkra mjing, mkra mjing mnơ̆ng dhơ̆ng lŏ hma. Mŭt mă bruă ti Êpul hgŭm bruă, amai Trang mâo hnư hrui wĭt hơĭt kjăp, lŏ mâo klei găl hriăm bruă, mđĭ klei thâo mă bruă:

 “Kâo hriê tinei kñăm čiăng nao mă bruă, hriăm bruă, ksiêm hriăm ya mta klei kâo ka thâo, čiăng ngă dŭm mta mnơ̆ng jăk hĭn”.

Hdră êlan mơ̆ng Êpul hgŭm bruă Sơn Bua jing mkŏ mjing bruă pla mjing, mkra mjing boh mnga bruă lŏ hma ti anăn mtam, mkŏ mjing bruă mă kơ mnuih ƀuôn sang leh anăn ƀrư̆ ƀrư̆ mkŏ mjing krĭng pla mjing hơĭt kjăp ti krĭng čư̆ čhiăng. Pô mphŭn mkŏ mjing Êpul hgŭm bruă anei jing amai Lê Thị Ánh (45 thŭn), mnuih Ca Dong, ti să Sơn Tây Thượng. Thŭn 2020, amai Ánh bi klă mdei bruă Knŭk kna, wĭt kơ ƀuôn sang mkŏ mjing Êpul hgŭm bruă Pla mjing Lŏ hma Dliê kmrơ̆ng leh anăn Mnia mblei Dŭm mta mnơ̆ng Sơn Bua hŏng klei čiăng ba mnơ̆ng dhơ̆ng lŏ hma alŭ wăl truh kơ anôk mnia mblei. Mơ̆ng ênoh prăk mơ̆ng Hdră kñăm ala čar mđĭ kyar bruă duh mkra - ala ƀuôn krĭng mnuih djuê ƀiă leh anăn krĭng čư̆ čhiăng wưng thŭn 2021 - 2030, Êpul hgŭm bruă Sơn Bua dưi đru blei maĭ mŏk mkra mjing, kdrăp yua mkra mjing.

Amai Lê Thị Ánh brei thâo, tal êlâo, Êpul hgŭm bruă mkra mjing dŭm mta mnơ̆ng mơ̆ng ana mtei msĕ si: mtei ƀhu krô, kpiê mtei, êa mtei; leh kơnăn pŏk mlar truh kơ êbŭng alê dliê, êbŭng kram, kñĭt leh anăn dŭm mta êa drao. Truh kơ ară anei, êpul hgŭm bruă mâo 7 mta mnơ̆ng OCOP:

“Ară anei, pŏk ngă kơ mnuih ƀuôn sang snăn brei pŏk sang mkra mjing anei. Pŏk sang mkra mjing snăn brei hrui blei, mnuih ƀuôn sang kơh jhŏng pla, jhŏng ngă. Bi tơdah pô blŭ ƀiădah pô amâo mâo boh sĭt snăn sĭt nik arăng amâo mâo jhŏng ôh. Jih klei hdĭp arăng amâo mâo klei mĭn leh anăn amâo mâo bi mlih klei thâo săng kơ bruă pla mjing ôh”.

Êlâo dih, lu gŏ êsei mnuih ƀuôn sang kreh lui sa phŭn mtei čăt mơ̆ng 5 truh kơ 6 phŭn êđai mbĭt anăn. Ana amĭ rông lu phŭn êđai, rông boh mtei mơh anăn boh điêt, hnơ̆ng tŭ jăk amâo đei jăk ôh. Đảng viên Lê Văn Hiền (37 thŭn), mnuih Ca Dong, ktrâo lač kơ mnuih ƀuôn sang knŏng lui mơ̆ng sa truh kơ dua phŭn, đru kơ ana amĭ mđĭ hnơ̆ng tŭ jăk rông boh mtei. Ayŏng Lê Văn Hiền brei thâo, êlâo dih, sa boh mtei čhĭ kơ phung ghan mnia knŏng mâo hlăm brô 20.000 - 30.000 prăk, ară anei mâo êpul hgŭm bruă blei hŏng ênoh đĭ 3 blư̆:

"Tơdah leh bi klă hriê kơ anei ngă snăn pô dôk nanao hlăm klei mĭn leh anăn mĭn tĭng brei ba anăp, nao êlâo, si srăng ngă čiăng kơ mnuih ƀuôn sang dưi hriăm dŭm klei pô mâo leh klei hriăm, ksiêm duah. Hŏng dŭm mta mnơ̆ng lŏ hma alŭ wăl, si srăng ngă čiăng dưi mâo ênoh čuăn snăn pô srăng mâo klei ksiêm duah, duh bi liê leh anăn ktuê dlăng dŭm knhuang mnuih ƀuôn sang ngă leh si ngă".

Nguyễn Xuân Thọ, Khua adŭ bruă duh mkra să Sơn Tây Thượng, čar Quảng Ngãi brei thâo, dŭm gru hmô êpul hgŭm bruă mkŏ mjing klei bi hgŭm pla mjing, mkra mjing leh anăn ba čhĭ mnơ̆ng dhơ̆ng lŏ hma, đru mkŏ mjing bruă mă, mđĭ hnư hrui wĭt kơ mnuih ƀuôn sang. Dŭm êpul hgŭm bruă mâo phung đảng viên bi hmô, ba anăp pla mjing đru mguôp bi mlih klei mĭn, hdră ngă kơ mnuih ƀuôn sang:

“Ară anei, ti alŭ wăl ăt mâo lu êpul hgŭm bruă. Grăp êpul hgŭm bruă mâo sa hdră duh mkra mdê mdê. Bi Êpul hgŭm bruă Sơn Bua mâo hdră bi hgŭm mđĭ boh tŭ yuôm, hŏng dŭm mta mnơ̆ng dhơ̆ng msĕ si čê boh truôl, mtei dliê, êbŭng alê leh anăn lu mta mnơ̆ng mkăn. Êdei anăp, tơdah bi hgŭm hŏng dŭm êpul hgŭm bruă ti alŭ wăl, hmei srăng mkŏ mjing lu mta mnơ̆ng dhơ̆ng kơ alŭ wăl, mbĭt anăn bi hgŭm hŏng dŭm alŭ wăl mkăn čiăng mkŏ mjing hdră mnơ̆ng dhơ̆ng mkăp kơ mnuih blei yua”.

Mơ̆ng dŭm mta mnơ̆ng juăt mưng mơ̆ng čư̆ dliê, phung đảng viên mnuih Ca Dong dôk đru mguôp pŏk êlan ngă bruă duh mkra mrâo ti Sơn Tây Thượng, čar Quảng Ngãi./.