Klei bi kƀĭn dưi mkŏ online mơ̆ng să Phú Thiện truh kơ dŭm să, ƀuôn hgŭm: Ayun Pa, Ia Rbol, Ia Sao, Pờ Tó, Ia Pa, Ia Tul, Phú Túc, Ia Dreh, Ia Rsai, Uar, mjing klei găl čiăng kơ lu mnuih ƀuôn sang nao hgŭm, hưn mthâo klei mĭn, klei čiăng leh anăn klei akâo truh kơ bruă kƀĭn ala, dŭm anôk bruă gưl dlông leh anăn alŭ wăl. Mnuih ƀuôn sang dŭm să, ƀuôn hgŭm hưn mdah leh lu mta phŭn kơ klei hdĭp mda: bruă msir mghaih klei truh, đru kơ klei luič liê leh klei truh yan adiê, mkra mđĭ anôk bruă êlan klông mlir să, mkra mđĭ dŭm hdră bruă êa doh, bruă msir mghaih hdră mtrŭn kơ mnuih mă bruă mdei hluê si Hdră mtrŭn 178.

Mbĭt hŏng dŭm mta phŭn kơ klei hdĭp mda ala ƀuôn, mnuih ƀuôn sang ăt bi êdah klei uêñ mĭn kơ bruă mkŏ dăp anôk bruă knŭk kna. Čih yap klei blŭ mơ̆ng mnuih ƀuôn sang, K'iăng khua bruă kƀĭn ala Nguyễn Hồng Diên lač klă, Gưl dlông amâo mâo hdră êlan lŏ bi mŭt gưl čar, gưl să. Hluê si klei čiăng hlăm boh sĭt grăp čar srăng ksiêm dlăng bruă mkŏ dăp gưl să bi djŏ guôp, tŭ dưn hĭn.