Aguah mbruê 21/7, ti Hà Nội, Dhar bruă mặt trận čar kwar Việt Nam ƀuôn prŏng Hà Nội mkŏ mjing klei bi tuôm, hdơr knga kơ phung kahan êka êkeh hđăp, kahan ruă duam êdah êdi leh anăn ƀĭng hgŭm mâo klei hdĭp dleh dlan ƀri bi hdơr 79 thŭn hruê phung kahan êngiă asei (27/7). Nao hlăm knăm anei mâo kiăng khua bruă Đảng ƀuôn prŏng Hà Nội Nguyễn Văn Phong mbĭt hŏng phung amĭ Việt Nam jhŏng ktang lehanăn 130 čô kahan êka êkeh mâo klei kdlưn hĭn.

Jing alŭ wăl mâo ênoh gŏ sang knŭk kna dlăng ba lu hĭn hlăm kluôm ala hŏng êbeh 800.000 čô mnuih, Hà Nội dlăng nanao hdră bruă ‘’Hdơr knga tla ai’ jing bruă klam kđi čar phŭn lehanăn klei đua klam yuôm bhăn.

Thŭn 2025, Ƀuôn prŏng mtrŭt mjhar leh Keh hdơr knga tla ai mâo êbeh 26 êklai prăk, mđup brei dŭm êtuh êbâo hnư mnơ̆ng, mđĭ hnơ̆ng lu hdră bruă čih hruê ai mă bruă lehanăn đru mkra mđĭ sang dôk kơ mnuih knŭk kna dlăng ba. Wưng bi hdơr thŭn anei, khua gĭt gai ƀuôn prŏng lŏ dơ̆ng mkŏ mjing klei čuă êmuh, mđup brei êbeh 114.500 hnư mnơ̆ng hŏng ênoh bi liê jih jang êbeh 273 êklai prăk, bi êdah klei hdơr knga prŏng prĭn hŏng phung mâo ai đru bruă krŭ kdơ̆ng.