Ti krĭng anôk dôk mrâo alŭ Điểm 9, să Ia Hiao, hlăm brô 70 boh sang tal êlâo dôk rŭ mdơ̆ng. Kahan hđăp Nay Kêr ti ƀuôn Čư̆ Plah Jai, sa hlăm dŭm gŏ sang ba anăp lăm lui sang dôk êjai, hơ̆k mơak bi êdah:

“Êlâo dih, klei hdĭp mnuih ƀuôn sang ti krĭng kreh êngăp êa tuôm hŏng lu klei dleh dlan leh anăn huĭ hyưt, boh nik hlăm yan hjan. Ară anei mâo knŭk kna mđing dlăng, đru rŭ mdơ̆ng anôk dôk mrâo, nao dôk ti krĭng kbưi, êđăp ênang hĭn, mnuih ƀuôn sang hơ̆k mơak leh anăn hơĭt ai tiê. Anei jing klei găl čiăng kơ mnuih ƀuôn sang bi hơĭt klei hdĭp, mđĭ kyar bruă duh mkra leh anăn ƀrư̆ ƀrư̆ mđĭ hnơ̆ng klei hdĭp. Hmei lač jăk kơ bruă sang čư̆ êa alŭ wăl mâo nanao klei mđing dlăng, đru kơ mnuih ƀuôn sang.”

 Hŏng mnuih ƀuôn sang Jarai, lăm lui anôk dôk amâo djŏ knŏng bi mlih anôk dôk ƀiădah lŏ mguôp hŏng ai tiê kriê pioh knhuah gru, pin êa djuê ana. Kyua klei gĭr hâo hưn, hrăm mbĭt mơ̆ng gưl bruă Đảng, bruă sang čư̆ êa alŭ wăl, mnuih ƀuôn sang sa ai êdi, hơĭt ai tiê êjai dŭm boh tŭ yuôm dhar kreh čing čhar, bruă pơ̆k mñam ăt dưi kriê pioh ti anôk dôk mrâo. Aduôn Ksor H'Hoa - Kiăng khua bruă Đảng, Khua ƀuôn Čư̆ Plah Jai, să Ia Hiao lač:

" Êjai mnuih ƀuôn sang nao dôk kơ anôk mrâo, dŭm boh tŭ yuôm dhar kreh djuê ana Jarai ăt dưi lŏ dơ̆ng kriê pioh leh anăn mđĭ lar. Mơ̆ng dŭm klei bhiăn djuê ana, bruă kriê dlăng msat, truh kơ dhar kreh čing čhar, mnuih ƀuôn sang gĭr krơ̆ng kjăp leh anăn ba dŭm knhuah dhar kreh anăn truh kơ anôk dôk mrâo. Mbĭt anăn, bruă pơ̆k mñam, hrĭ mñam ăt lŏ dơ̆ng krơ̆ng kjăp hlăm dŭm gŏ sang. Hmei ăt kreh mkŏ mjing nanao dŭm hruê knăm, bruă dhar kreh, kdŏ mmuñ čiăng kơ mnuih ƀuôn sang bi mjĕ mjuk, mđĭ hĭn ai tiê bi hgŭm leh anăn hrăm mbĭt kriê pioh knhuah dhar kreh djuê ana mơ̆ng đưm."

Ti ƀuôn Jứ, să Ia Tul, 207 gŏ êsei mnuih ƀuôn sang kreh tuôm hŏng klei êngăp êa hlăk dôk mjêč mbĕ đuê̆ kơ anôk dôk mrâo giăm 22 ha. Hlăm anăn, 152 gŏ êsei ruah rŭ mdơ̆ng dŭm kdrêč sang krum kyâo juăt mưng ba mdơ̆ng čiăng mkiêt mkriêm prăk bi liê leh anăn krơ̆ng kjăp knhuah sang krum juăt mưng. Knuă druh să mbĭt hŏng êpul kahan ksiêm, lĭng kahan klă anăp đru rŭ mdơ̆ng, tŭk knă, mbha êa leh anăn mprăp êdeh mdiăng sang kơ mnuih ƀuôn sang. Ksor Yu, mnuih ƀuôn sang bi hmô ƀuôn Jứ, hơ̆k mơak lač:

“Ară anei, gŏ sang kâo mprăp mbĕ đuĕ kơ anôk dôk mrâo. Êlâo dih, êjai dôk ti ƀuôn hđăp, sĭt truh yan hjan êa lip jêñ jêñ mâo klei êngăp êa, klei hdĭp mnuih ƀuôn sang tuôm hŏng lu klei dleh dlan, đa đa mnơ̆ng rông mâo êa lip kpuh mđung. Ară anei mâo bruă sang čư̆ êa alŭ wăl mkŏ dăp, đru anôk dôk mrâo êđăp ênang, prŏng siam hĭn, gŏ sang kâo hơ̆k mơak leh anăn hơĭt ai tiê. Ti anei mâo djăp mta klei găl msĕ si sang hră, sang êa drao gŭn…, snăn klei hdĭp mda leh anăn klei hdĭp mnuih ƀuôn sang găl ênưih hĭn. Hmei hmăng hmưi srăng hnưm bi hơĭt klei hdĭp, mđĭ kyar bruă duh mkra ti anôk dôk mrâo. Kâo lač jăk kơ bruă sang čư̆ êa alŭ wăl mđing dlăng, đru kơ mnuih ƀuôn sang."

Hluê si hdră, čar Gia Lai mâo 16 alŭ wăl brei mkŏ mjing hdră mbĕ đuĕ mjêč hŏng 1.858 gŏ sang, mâo 13 hdră lŏ mkŏ anôk dôk mrâo leh anăn 3 hdră bi mguôp. Ênoh prăk duh bi liê êbeh 2.100 êklai prăk. Hlăm anăn, êbeh 713 êklai prăk duh bi liê kơ bruă nah gŭ bi knar; êbeh 258 êklai prăk đru klă anăp kơ mnuih ƀuôn sang; leh anăn êbeh 1.136 êklai prăk mkăp kơ bruă čiu hnô, ruh mgaih anôk ala. Hlăm wưng êgao, dŭm să Ia Hiao, Ia Tul, Uar, Ia Rsai leh anăn Ia Dreh hrăm mbĭt pŏk ngă hdră bruă. Bruă Đảng čar, Anôk bruă sang čư̆ êa čar Gia Lai mdưm dŭm hnơ̆ng kčah klă klơ̆ng leh anăn ktang phĭt: Êlâo kơ hruê 30/8 ba jao anôk bruă nah gŭ; êlâo kơ 31/10 ba mnuih ƀuôn sang kbiă mơ̆ng krĭng huĭ hyưt; êlâo kơ hruê 30/11 bi mklă, leh anăn êlâo kơ hruê 15/12 thŭn anei brei bi leh. Ti să Ia Hiao - anôk pŏk ngă hdră mkŏ dăp kơ 180 gŏ sang, Phạm Văn Phương - Khua bruă Đảng să mñă klă klei gĭr mơ̆ng alŭ wăl:

" Bruă ruah dŭm gŏ êsei ba anăp hluê ngă êlâo čiăng mjing klei lar bra, hmăi truh kơ ai tiê mnuih ƀuôn sang adôk. Truh ti wưng anei, să dôk pŏk ngă dŭm hdră čiăng hluê ngă bruă čiu hnô, đru kơ 24 gŏ êsei tal êlâo. Kơ hdră hluê ngă, mơ̆ng ară anei truh kơ hruê 1/10/2026, să gĭr bi leh dŭm hnơ̆ng čuăn čiăng dăp, mkŏ dăp 100 gŏ êsei mnuih ƀuôn sang; mbĭt anăn hluê ngă dŭm hdră ksiêm dlăng, čih mkra hdră čiu hnô, bi mklă prăk bi liê, ruah sang bi hmô leh anăn pŏk ngă hdră rŭ mdơ̆ng sang dôk hlăm anôk dôk mrâo. Truh hruê 31/12/2026, ƀuôn hgŭm gĭr bi leh bruă tĭng tla ênoh duh bi liê ti anôk dôk hđăp kơ mnuih ƀuôn sang leh anăn bi liê dŭm ênoh prăk đru hluê si hdră êlan ti anôk dôk mrâo, rơ̆ng hluê ngă djŏ hdră kčah mtrŭn."

Sa boh sang mrâo kjăp amâo djŏ knŏng mgang kơ mnuih ƀuôn sang găn yan hjan hlĭm, ƀiădah lŏ jing anôk jưh knang kjăp čiăng kơ mnuih ƀuôn sang hơĭt ai tiê mă bruă knuă. Klei mĭn Đảng bi mguôp hŏng ai tiê mnuih ƀuôn sang, ai tiê pral kdal mơ̆ng "Hdră bruă Quang Trung" dôk bi mlih dŭm krĭng lăn êngăp êa jhat rai jing dŭm krĭng ƀuôn sang mrâo trei mđao, sah mdrŏng./.