Leh hdră mtrŭn mrô 36 dưi ba mdah, ti Êpul hgŭm bruă lŏ hma mtah Krông Pač, klei mơak ƀuh klă ti ƀô̆ mta phung hgŭm. Lu thŭn êgao, êpul hgŭm bruă hŏng 7 čô hgŭm klă klơ̆ng, êbeh 200 gŏ sang bi hgŭm leh anăn êbeh 120 ha durian gĭr ktưn mkra mjing hluê hnơ̆ng čuăn VietGAP, ba yua hră mơar điện tử, mkŏ mjing hdră kriê dlăng krĭng pla mjing klă klơ̆ng.

Ƀiădah, khădah êbeh 70% ênhă mâo djăp ênoh čuăn VietGAP, êpul hgŭm bruă ăt ka dưi mkăp mrô krĭng pla mjing kyua lu ênhă pla mjing bi mguôp, ka djŏ hŏng klei čuăn kơ krĭng pla mjing doh hluê si klei čuăn êlâo dih. Trần Văn Thắng, Khua êpul hgŭm bruă brei thâo Hdră mtrŭn 36 pŏk klei găl čiăng kơ dŭm krĭng pla mjing klă sĭt, hluê ngă hdră êlan ƀiădah tuôm hŏng klei kčah mtrŭn dưi dưn yua pral hĭn hŏng anôk ba čhĭ kơ ala tač êngao.

“Hmei yap yuôm bhăn êdi bruă knŭk kna mâo klei mghaih msir pral, ktang phĭt čiăng mkra mlih dŭm klei amâo mâo djŏ mơ̆ng hdră mtrŭn 38. Klei anăn srăng ruh mgaih klei dleh dlan kơ ƀĭng ngă lŏ hma leh anăn êpul hgŭm bruă. Dŭm mta mnơ̆ng ngă leh djŏ hdră bhiăn ară anei mâo klei găl ba čhĭ kơ ala tač êngao, ai bi ktưn mơ̆ng durian Việt Nam srăng dưi mđĭ. Kâo đăo knang mnuih ƀuôn sang srăng mâo klei thâo săng hĭn hlăm bruă rơ̆ng hnơ̆ng tŭ jăk, mơ̆ng anăn durian Việt Nam dưi bi ktưn leh anăn kpưn đĭ hlăm anôk mnia mblei tar rŏng lăn."

Êpul êya anôk bruă duh mkra ba čhĭ mnơ̆ng kơ ala tač êngao ăt bi mklă Hdră mtrŭn 36 msir mghaih leh djŏ "kđiêk" prŏng hĭn jing klei ngă hră mơar mkăp mrô krĭng pla mjing lehanăn anôk đŭng hruh. Huỳnh Kiều, bi ala anôk bruă duh mkra ba čhĭ boh durian ti Dak Lak brei thâo, hră mơar akâo mkăp mrô mơ̆ng anôk bruă dôk guôn êbeh 4 mlan. Hluê ngă kluôm ênŭm online, mbha gưl kơ gưl să lehanăn bi hrŏ wưng msir mghaih srăng mjing klei bi mlih prŏng kơ hdră ba čhĭ mnơ̆ng kơ ala tač êngao. Huỳnh Kiều ăt akâo kơ dŭm dhar bruă djŏ tuôm lŏ dơ̆ng ba mdah hdră klă klơ̆ng dŭm klei bhiăn čiăng kơ anôk bruă duh mkra ênưih hluê ngă.

“Akâo kơ Knơ̆ng bruă tuh tia bi klă dŭm klei bhiăn jing hdră êlan ênưih, ênưih hluê ngă čiăng kơ anôk bruă duh mkra ênưih ba yua, rơ̆ng djŏ klei bhiăn leh anăn bi hrŏ wưng msir mghaih. Mbĭt anăn, knơ̆ng bruă Jia brei mâo klei ktrâo lač klă klơ̆ng čiăng kơ anôk bruă duh mkra, phung ghan mnia leh anăn mnuih ƀuôn sang krĭng pla mjing hluê ngă djŏ klei bhiăn, bi hrŏ dŭm klei truh amâo jăk kơ prăk jia hlăm hdră hrui blei, ba čhĭ boh durian."

Hdră mtrŭn 36 amâo djŏ knŏng mâo klei čang hmăng ruh mgaih klei ngă hră mơar mkăp mrô ƀiădah lŏ mjing tur knơ̆ng msir mghaih dŭm klei êdu kƀah dôk mâo hlăm hdră ba čhĭ boh durian. Kluôm čar ară anei mâo hlăm brô 200 anôk đŭng hruh ƀiădah knŏng hlăm brô 16 anôk dưi mkăp mrô bi mklă brei kyua Knơ̆ng bruă ksiêm dlăng mnơ̆ng dhơ̆ng găn knông lăn China mkăp kơ dŭm anôk bruă duh mkra ala tač êngao mkra mjing, mkra mjing amâo dah kriê pioh mnơ̆ng dhơ̆ng leh anăn mnơ̆ng dhơ̆ng lŏ hma čiăng dưi brei ba čhĭ klă anăp kơ wăl anôk mnia mblei China (mrô GACC); ênoh krĭng pla dưi mkăp mrô ăt adôk ƀiă. Klei anei ngă kơ lu anôk bruă duh mkra ba čhĭ kơ ala tač êngao hluê hŏng anôk bruă mkăn, mâo klei čhĭ mnia mrô leh anăn lu klei amâo jăk kơ hră mơar.. Aduôn Hoàng Thị Thanh Thủy, Khua knơ̆ng bruă ksiêm dlăng prăk jia ti Dak Lak brei thâo:

"Hdră mtrŭn 36 mrâo mtrŭn kâo klă sĭt mơak snăk. Klei bhiăn dưi ruh mtlaih leh sa kdrêč, klei ngă hră mơar mkăp mrô pral leh anăn hrăm mbĭt srăng bi hrŏ klei kƀah mrô krĭng pla mjing, kƀah anôk đŭng hruh, mjing wăl anôk bi ktưn mtăp mđơr hĭn. Hmei srăng đru kơ dŭm anôk bruă duh mkra leh anăn ƀĭng ngă lŏ hma bi leh hră mơar čiăng hnưm dưi mkăp mrô."

Lê Anh Trung, Khua êpul hgŭm durian čar Dak Lak bi mklă, klei anôk bruă duh mkra čang hmăng amâo djŏ knŏng jing klei ngă hră mơar dưi bi hrŏ ƀiădah lŏ jing hdră kriê dlăng mrâo. Bruă bi mlih jing hdră čŏng hưn mdah, čŏng đua klam mguôp hŏng klei ksiêm dlăng êdei srăng bi hrŏ klei ktrŏ bruă knŭk kna, mbĭt anăn mđĭ bruă đua klam mơ̆ng dŭm anôk bruă hlăm kluôm hdră mkra mjing.

"Kâo čang hmăng dŭm klei gun kpăk kơ klei ngă hră mơar ba čhĭ kơ ala tač êngao amâo srăng lŏ jing klei gun kpăk ôh. Tơdah dŭm klei găl dưi ngă hŏng klei ênưih, djŏ hdră bhiăn snăn ăt srăng bi hrŏ klei ngă măk ƀai, kpăk đuôm hlăm bruă msir mghaih hră mơar. Yuôm bhăn hĭn, anei srăng jing tur knơ̆ng čiăng kơ Dak Lak mkŏ mjing krĭng pla mjing doh, êđăp ênang, djăp ai dưi mkăp djŏ hŏng klei čiăng mơ̆ng jih jang wăl anôk mnia mblei tar rŏng lăn."

Hdră mtrŭn mrô 36 mơ̆ng Knŭk kna bi klă bruă mkăp brei leh anăn kiă kriê mrô krĭng pla mjing, anôk đŭng hruh dưi ngă kluôm ti mbah bruă Knŭk kna ala čar, klei dưi tŭ mă, msir hră mơar dưi mbha gưl kơ Bruă sang čư̆ êa gưl să. mbĭt anăn mmông msir dưi bi hrŏ jih hnơ̆ng 3 hruê mă bruă hŏng hdră mơar amâo djŏ mkăp mrô mnia mblei.

Hŏng Dak Lak - alŭ wăl mâo ênhă durian prŏng hĭn mơ̆ng lăn čar, Hdră mtrŭn mrô 36 dưi hnăng hmưi amâo djŏ knŏng ruh mgaih klei kpăk kơ hră mơar Knŭk kna ƀiădah lŏ đru bi klă boh tŭ dưn, mđĭ hnơ̆ng jăk mnơ̆ng dhơ̆ng leh anăn ai dưi bi ktưn mơ̆ng dhar bruă durian ti anôk mnia mblei tar rŏng lăn./.