Ti alŭ Dak Snao, să Quảng Sơn, alŭ wăl huĭ srăng klưh hroh prŏng êbeh 4ha, hmăi truh 79 gŏ sang hŏng 454 čô mnuih. Jih 79 gŏ sang mâo leh bruă sang čư̆ êa alŭ wăl mbĕ đuê̆ ti anôk êđăp ênang. Knơ̆ng bruă sang čư̆ êa čar Lâm Đồng hưn mthâo boh klei mjêč kơ klei yan adiê ngă ti alŭ wăl anei. Ti să D'ran, êa hnoh Cát đoh êtăng ngă klưh hroh kjham jơ̆ng kban bê tông ti alŭ Ga, ƀuôn Phú Thuận, ngă kơ 8 gŏ sang hŏng 35 čô mnuih bi ktlah.

Bruă sang čư̆ êa alŭ wăl iêô mthưr leh êpul êya, kdrăp mnơ̆ng msir mghaih klei klưh hroh, pŏk êlan êjai, mbĕ mnuih ƀuôn sang mơ̆ng krĭng huĭ hyưt leh anăn mkŏ mjing hdră gak răng, hưn brei răng. Hlăk êjai anăn, lu blư̆ hlăm dua gưl hruê 19 leh anăn 20/9, lăn boh tâo mơ̆ng taluy nah dlông kčŭn čư̆ Prenn, ƀuôn hgŭm Xuân Hương - Đà Lạt hroh hlăm ktuê êlan.

Êpul bruă djŏ tuôm pral mâo anôk mbha êlan găn êrô, iêô mthưr êdeh êdâo hrui êmiêt lăn boh tâo, rơ̆ng êđăp ênang kơ mnuih lehanăn êdeh êdâo găn êrô. Ti anăp klei mâo dleh dưi ksiêm dlăng mơ̆ng yan adiê ngă, Knơ̆ng bruă sang čư̆ êa čar Lâm Đồng mtă kơ dŭm alŭ wăl čuăl krĭng huĭ hyưt, dăp êpul gak răng, mbĕ mnuih ƀuôn sang leh anăn rơ̆ng mnơ̆ng dhơ̆ng yua aguah tlam.