Ti krah adiê mđiă yang hruê dơ̆ng, Y Ung Byă, ti ƀuôn Cuôr, să Ea Mdroh, čar Dak Lak kreh kruiñ rŭ mdơ̆ng sang. Dua čô mnuih mă bruă đru bi lŭk ƀrĭk, khăt msei, bi mô̆ ñu pa pŭ čuah simăng đĭ ti gơ̆ng. Sang prŏng 72 m2 hlăk ƀrư̆ ƀrư̆ bi leh. Y Ung brei thâo, sang ƀun 6 čô mnuih huă ƀơ̆ng, sui hŏng anei ăt hmăng hmưi mâo sang kjăp. Ară anei, Êpul bruă Đảng kahan ksiêm să Ea Mdroh đru prăk blei mnơ̆ng rŭ mdơ̆ng, Y Ung mưn thiăm mnuih mă bruă leh anăn čŏng pô rŭ mdơ̆ng sang hmăng hmưi:

“Mâo sang jing mơak, mĭn tĭng srăng gĭr mă bruă knuă, lŏ čan thiăm ayŏng adei găp djuê čiăng bi leh sang. Sang jing boh kdrŭt čiăng lŏ gĭr ktưn mă bruă knuă, kriê dlăng anak čô hriăm hră mơar truh ti anôk kčah, gĭr ktưn tlaih ƀun”.

Ăt ti ƀuôn Cuôr, gŏ sang Y-Đek Êñuôl mrâo mŭt dôk hlăm sang mrâo prŏng siam, kjăp. Y Đek amâo mâo hơ̆k mơak, mgei ai tiê kyua giăm 30 thŭn êgao, jih gŏ sang ñu hdĭp hlăm sang kyâo hđăp đưm, čuôr sang hluh ƀrôč. Mơ̆ng mlan 8 thŭn dih, gŏ sang ñu mâo Êpul bruă Đảng dŭm anôk bruă Đảng să Êa Mdroh hrăm mbĭt, nao čuă êmuh, mđĭ ai. Amâo djŏ knŏng đru sa drei êmô mjeh, Êpul bruă Đảng dŭm anôk bruă Đảng să lŏ đru êbeh 95 êklăk prăk rŭ mdơ̆ng sang bi hgŭm mguôp. Mâo sang, mâo hdră mđĭ kyar bruă duh mkra, Y Đek hơĭt ai tiê mă bruă leh anăn čuăl mkă kơ êdei anăp.

“Kâo mâo čan thiăm ayŏng adei găp djuê mâo 40 êklăk leh anăn čŏng bi mguôp ngă bruă dưi rŭ mdơ̆ng sang msĕ si ară anei. Ară anei mâo sang leh snăn hơĭt ai tiê gĭr ktưn mă bruă knuă, tla ƀrư̆ ƀrư̆ dŭm ênoh adôk nư, leh anăn lŏ dơ̆ng mguôp čiăng lŏ mkra thiăm sang pui leh anăn bruă nah tluôn, leh anăn mâo klei găl hĭn snăn dưi lŏ pŏk mlar thiăm ênhă, mkŏ thiăm adŭ dôk kơ prŏng hĭn”.

 Hluê si Y Săk Kƀuôr, Khua ƀuôn Čuôr, amâo djŏ knŏng hriê mđup brei sa blư̆ leh anăn đuê̆, dŭm êpul bruă mâo klei bi mguôp, kreh nao êmuh, ktuê dlăng, ktrâo lač, bi mguôp ai dưi leh anăn mđĭ ai dŭm gŏ sang ƀrư̆ ƀrư̆ bi hơĭt klei hdĭp. Hdră ngă anei mrâo êdi ƀiădah ba wĭt leh boh tŭ dưn klă sĭt, klă sĭt đru kơ dŭm gŏ sang ƀun mâo anôk dôk hơĭt, ƀrư̆ ƀrư̆ kpưn đĭ. Ƀuôn Čuôr ară anei mâo êbeh 370 gŏ sang ƀiădah mâo giăm 100 gŏ sang dôk hlăm ênoh ƀun leh anăn giăm ƀun, Y Săk čang hmăng.

“Mơ̆ng gru hmô snăn mâo lu klei hrăm mbĭt, bi đru, mnuih ƀuôn sang mâo hdră mđĭ kyar hĭn, mâo đru leh êmô, rŭ mdơ̆ng sang, mjing klei đăo knang, boh kdrŭt čiăng kơ mnuih ƀuôn sang gĭr ktưn mă bruă knuă, gĭr ktưn kpưn đĭ. Čang hmăng kơ anăp anei srăng mâo thiăm lu klei đru, hrăm mbĭt msĕ snei čiăng kơ dŭm klei dleh dlan srăng mâo thiăm klei găl čiăng găn klei dleh dlan, mđĭ kyar bruă duh mkra”.

Hŏng êbeh 7.000 gŏ sang, hlăm anăn giăm 900 gŏ sang ƀun leh anăn giăm ƀun, čiăng dưi mâo mta kñăm amâo lŏ mâo ôh gŏ sang ƀun hlăm thŭn 2030 hluê si Hdră mtrŭn bruă Đảng čar Dak Lak, să Êa Mdroh amâo dưi knŏng čang guôn kơ dŭm hdră đru. Leh bi mŭt leh anăn ngă bruă knŭk kna alŭ wăl 2 gưl, bruă Đảng să ksiêm dlăng pŏk ngă gru hmô "Grăp êpul bruă Đảng hrăm mbĭt hŏng gŏ sang tlaih ƀun", iêu mtrŭt dŭm êpul bruă Đảng klă anăp mguôp hŏng grăp gŏ sang, hrăm mbĭt ruh mgaih klei dleh dlan, ktrâo lač mđĭ kyar hdră duh ƀơ̆ng leh anăn bi mguôp dŭm ai dưi đru. Leh sa thŭn, gru hmô dưi pŏk ngă ti 4 êpul bruă Đảng, đru msir lăm dua boh sang dôk êjai, đru kơ pă gru hmô duh ƀơ̆ng kơ dŭm gŏ sang ƀun. Nguyễn Văn Bông, kiăng khua dlăng bruă Đảng să Êa Mdroh brei thâo, alŭ wăl dôk mđing truh mkŏ mjing hdră ngă bruă čiăng kơ grăp êpul bruă Đảng klă sĭt jing anôk knang mơ̆ng mnuih ƀuôn sang.

“Klei čang hmăng prŏng hĭn amâo djŏ ôh jing drei dưi đru dŭm ênoh prăk, dŭm boh sang, dŭm drei êmô ƀiădah jing mjing klei đăo knang kơ mnuih ƀuôn sang djuê ƀiă anăn jing amâo mâo pô lui kơ tluôn ôh lehanăn mâo nanao knuă druh bruă sang čư̆ êa alŭ wăl nao mbĭt. Mbĭt anăn đru kơ knuă druh, đảng viên tơdah nao hlăm klei mă bruă ti nah gŭ sĭt nik jing jĕ giăm hŏng mnuih ƀuôn sang, thâo săng kơ mnuih ƀuôn sang hĭn mơh".

Leh dŭm boh tŭ dưn tal êlâo, bruă Đảng să Êa Mdroh dôk mprăp ksiêm wĭt gru hmô čiăng lŏ dơ̆ng bi leh leh anăn pŏk mlar pŏk ngă ti dŭm anôk bruă Đảng sang hră, hŏng klei čang hmăng bi lar ai tiê hrăm mbĭt truh kơ lu mta bruă hlăm klei hdĭp alŭ wăl.