Hluê si klei hưn mdah mơ̆ng phŭn bruă lŏ hma leh anăn wăl hdĭp mda, hlăm ênoh 38 klei kčĕ mơ̆ng EC, mâo 31 klei kčĕ dưi bi leh, adôk 5 klei kčĕ hlăk lŏ dơ̆ng dưi bi leh hluê hdră leh anăn 2 klei kčĕ čiăng bi trông, bi klă thiăm čiăng rơ̆ng djŏ guôp hŏng boh sĭt leh anăn hdră bhiăn Việt Nam. Truh jih mlan 9, kluôm ala mâo êbeh 80.000 hô̆ pui trah mă kan dưi bi mklă, hưn mthâo hlăm kdrăp mrô bruă trah mă kan ala čar. Ênoh hô̆ mran dưm leh kdrăp ksiêm dlăng êlan nao mâo giăm 99%.

Bi klă klei bi kƀĭn, K'iăng khua knŭk kna mtă mơ̆ng ară anei truh kơ knhal jih thŭn gĭr hluê ngă "5 amâo dưi ngă" hlăm bruă gang mkhư̆ IUU: amâo lŏ mâo ôh hô̆ mran tuôm hŏng klei mnuih ala tač êngao mă kơ̆ng; amâo lŏ mâo ôh hô̆ mran amâo djăp klei găl ngă bruă; amâo lŏ mâo ôh klei ngă soh VMS sui; amâo lŏ mâo ôh ênoh mnơ̆ng dhơ̆ng kƀah klei dưi tui duah phŭn agha; amâo lŏ mâo ôh ênoh hưn amâo djŏ hŏng klei čih, hră mơar leh anăn boh sĭt. Dŭm alŭ wăl brei kriê dlăng kjăp grăp kŭm păn, rơ̆ng kơ klei čih pioh djŏ klă, bi mguôp, dưi ksiêm dlăng; msir mghaih jih dŭm klei dôk mâo, amâo lui sa alŭ wăl ngă ka jăk hmăi truh kơ klei gĭr mbĭt hlăm mta kñăm ruh mgaih klei kčŭt hưn “Hră kñĭ” mơ̆ng EC.