Ti alŭ Sômalơng A, ƀuôn hgŭm Ia Hiao, êlan lăn êngăp êa, điêt dhiêt êlâo dih ară anei dưi pŏk prŏng, tuh bêtông, êrô êbat găl ênưih hĭn. Ti akŏ êlan jing sang Siu Hiếu, Khua Knơ̆ng bruă mặt trận čar kwar Việt Nam ƀuôn hgŭm Ia Hiao. Kdrêč lăn ti anăp gŏ sang ñu dôk ti anôk êlan dưi pŏk prŏng. Amâo djŏ ƀiă ôh mnuih dưi mĭn tơdah brei lăn mâo ênoh mơ̆ng gŏ sang, ƀiă ñu bi klă myơr lăn. Siu Hiếu lač, čiăng mtrŭt mjhar mnuih ƀuôn sang snăn knuă druh brei ngă êlâo.

"Kâo pô bi hmô hlăm bruă hâo hưn mtrŭt mjhar mnuih ƀuôn sang myơr lăn, mnơ̆ng rŭ mdơ̆ng čiăng pŏk mlar êlan. Hŏng gŏ sang hmei snăn leh hâo hưn mtrŭt mjhar mnuih hlăm gŏ sang leh anăn gŏ sang snăn gŏ sang sa ai myơr sa kdrêč lăn pŏk phai êlan. Lŏ dơ̆ng mđĭ lar bruă klam đảng viên ba anăp hlăm bruă mtrŭt mjhar."

Mơ̆ng klei bi hmô mơ̆ng phung knuă druh, đảng viên, mnuih ƀuôn sang Ia Hiao ƀrư̆ ƀrư̆ sa ai hŏng hdră pŏk mlar êlan klông krĭng ƀuôn sang, êlan hlăm lŏ hma. Truh kơ ară anei, hlăm brô 450 gŏ êsei mnuih ƀuôn sang čŏng myơr lăn, mnơ̆ng rŭ mdơ̆ng čiăng pŏk mlar 30 bĭt êlan ti 11 alŭ, ƀuôn, hŏng boh taih êbeh 12,4 km.

Ti alŭ Yên Phú 2, Vũ Thị Lý ăt mprăp rŭ hĕ mnư̆ kjăp mơ̆ng gŏ sang pô čiăng pŏk êlan. Hluê si aduôn Lý, êlâo kơ pŏk ngă, knuă druh alŭ wăl lu blư̆ nao mtô mblang čiăng kơ mnuih ƀuôn sang thâo săng êlan prŏng hĭn snăn gŏ sang pô dưi dưn.

"Pŏk phai êlan kyua  êdeh êdâo ară anei đĭ kyar ktang êdi, hlăm ƀuôn mâo leh wăt êdeh ô tô, ară anei mâo Đảng leh anăn knŭk kna mđing dlăng jing hơ̆k mơak êdi, pŏk mlar êlan kâo mprăp rŭ hĕ mnư̆ kjăp myơr lăn pŏk mlar êlan".

Mơ̆ng knhal jih thŭn 2025 truh kơ ară anei, să Ia Hiao duh bi liê leh hlăm brô 3,6 êklai prăk bi leh êlan klông leh anăn knơ̆ng kdơ̆ng êa hlăm lŏ hma hlăm ênhă êbeh 40 ha. Alŭ wăl mĭn tĭng lŏ bi rai dŭm kdrêč êlan điêt, mjing dŭm kdrăn lŏ prŏng, mjing klei găl ba yua maĭ mŏk hlăm bruă pla mjing, mđĭ hnơ̆ng mâo boh mnga leh anăn boh tŭ bruă pla mjing.

Dŭm ênoh mrô duh bi liê knŏng bi êdah sa kdrêč klei yăl dliê. Klei yuôm bhăn hĭn jing ti anôk bruă mkŏ mkra dưi mdưm leh anăn ya bruă dưi msir mghaih mơ̆ng mnuih ƀuôn sang. Ti ƀuôn Ma Hrai, Nay Hak mâo êbeh sa sao mdiê leh pla lu thŭn. Êlâo adih, bruă pla mjing mơ̆ng gŏ sang jưh knang lu kơ yan adiê. Hjan prŏng êa lip, mđiă không kƀah êa; mâo yan luic̆ liê, mâo yan hrui pĕ amâo mâo lu ôh. Hlăk anôk mkŏ mkra dưi duh bi liê kjăp, êa truh kơ lŏ hơĭt kjăp hĭn, klei rŭng răng mơ̆ng phung pla mdiê msĕ si gŏ sang Nay Hak ăt luič ƀrư̆ ƀrư̆.

"Sang kâo mâo êbeh 1 sao mdiê pla lu thŭn hŏng anei leh, mâo thŭn êngăp êa luič jih, mâo thŭn thu krô hrui pĕ amâo mâo lu ôh. Ară anei êlan mnuôr êa dưi duh bi liê kjăp krih êa rơ̆ng kjăp kyua anăn kâo hơ̆k mơak êdi".

Hdră mtrŭn Klei bi kƀĭn bruă Đảng să Ia Hiao wưng thŭn 2025-2030 bi mklă sa hlăm dŭm klei kdlưn hĭn yuôm bhăn jing mkŏ mjing bruă sang čư̆ êa đru kơ mnuih ƀuôn sang, mkŏ mjing, kpă ênuah, mă mnuih ƀuôn sang leh anăn anôk bruă duh mkra jing phŭn. Anei ăt jing hdră alŭ wăl bi klă ai tiê Asăp mtrŭn mrô 05 mơ̆ng Phŭn bruă kđi čar kơ "Mtrŭt mđĭ hdră tui hriăm leh anăn hluê ngă klei mĭn, knhuah hdĭp, knhuah mă bruă Hồ Chí Minh, boh nik klei čiăng kơ bruă klam bi hmô, knhuah mă bruă, hdră mă bruă kreh knhâo, êngiê, jĕ giăm hŏng mnuih ƀuôn sang, jĕ giăm hŏng mnuih ƀuôn sang, kyua mnuih ƀuôn sang.

Ti să Ia Hiao, ai tiê anăn dưi mphŭn mơ̆ng bruă knuă druh trŭn nao kơ nah gŭ, mđing hmư̆ leh anăn msir mghaih dŭm boh klei mnuih ƀuôn sang dôk mđing, hrô kơ knŏng knang kơ klei hưn mdah. Hluê si Bùi Hữu Tâm, Kiăng khua dlăng bruă Đảng să Ia Hiao, čiăng mâo klei bi klă djŏ snăn êlâo hĭn knuă druh brei jĕ giăm mnuih ƀuôn sang, thâo săng mnuih ƀuôn sang leh anăn mdưm pô hlăm klei hdĭp mnuih ƀuôn sang.

"Jĕ giăm hŏng mnuih ƀuôn sang, uêñ mĭn leh anăn thâo klă klei čiăng mơ̆ng mnuih ƀuôn sang jing klei yuôm bhăn hĭn. Mâo nao truh kơ mnuih ƀuôn sang snăn kơh dưi thâo klă klei čiăng leh anăn ba mdah dŭm hdră êlan gĭt gai. Bi tơdah kbưi hŏng mnuih ƀuôn sang leh anăn dôk hmư̆ klei hâo hưn snăn dleh snăk. Tal dua lĕ jing brei mdưm anôk bruă knuă druh ti anôk mnuih ƀuôn sang sĭt srăng mŭt hlăm dŭm met lăn, rŭ hĕ mnư̆ snăn pô ƀuh ênguôt snăk, dưm ti anôk anăn leh anăn mtrŭt mjhar mnuih ƀuôn sang. Tơdah ngă msĕ snăn snăn mnuih ƀuôn sang ƀuh knuă druh thâo klă klei čiăng leh anăn klei kpăk mơ̆ng mnuih ƀuôn sang snăn diñu srăng kah mbha wĭt hŏng pô".

Ti Ia Hiao, dŭm ktuê êlan dưi pŏk mlar, hdră bruă knơ̆ng kdơ̆ng êa ƀrư̆ ƀrư̆ bi leh, mjing thiăm klei găl čiăng kơ mnuih ƀuôn sang mđĭ kyar bruă duh mkra, mđĭ hnư hrui wĭt. Mơ̆ng dŭm bruă ngă klă klơ̆ng, bruă sang čư̆ êa alŭ wăl ƀrư̆ ƀrư̆ bi sĭt hdră êlan mă mnuih ƀuôn sang jing phŭn, mă boh tŭ dưn mkăp kơ mnuih ƀuôn sang jing hnơ̆ng mkă. Anăn ăt jing hdră phung knuă druh, đảng viên ti Ia Hiao bi sĭt bruă hluê ngă klei mĭn, knhuah hdĭp, knhuah mă bruă Hồ Chí Minh, mphŭn mơ̆ng dŭm bruă klă klơ̆ng, mguôp hŏng klei hdĭp leh anăn klei čiăng mơ̆ng mnuih ƀuôn sang.