Leh mprăp dŭm mta mnơ̆ng dhơ̆ng điêt leh anăn dŭm hdruôm hră điêt siam lu êa kulơr, Thiếu tá Lại Văn Đạt đĭ êdeh atăt hmei trŭn ti alŭ wăl. Thâo ayŏng adei nao mbĭt jing mnuih Jarai, snăn ayŏng bi êdah hŏng klei blŭ alŭ wăl:

"Hruê anei, drei nao čuă ƀuôn Ksing. Anei jing ƀuôn sang siă suôr hŏng thŭn kâo dôk điêt. Mnuih ƀuôn sang Jarai tinei hdĭp jĕ giăm leh anăn khăp čiăng; khădah klei hdĭp mơ̆ng lu gŏ sang ăt dôk lu klei dleh dlan".

Kkiêng leh anăn đĭ hriê kơ prŏng ti krĭng lăn anei, Thiếu tá Lại Văn Đạt mâo leh klei găl bi tuôm hŏng mnuih ƀuôn sang Jarai mơ̆ng điêt. Hlăm hdră mă bruă, kreh bi tuôm, hâo hưn, mtrŭt mjhar, ñu lŏ dơ̆ng hriăm thiăm, yua klei Jarai lu hĭn.

Grăp gưl wĭt kơ alŭ wăl, Thiếu tá Đạt leh anăn ƀĭng găp lŏ ba dŭm hnư mnơ̆ng điêt. Anăn jing dŭm hdruôm hră kơ phung hđeh mâo klei hdĭp dleh dlan. Mơ̆ng klei mtrŭt mjhar găp djuê, ƀĭng găp leh anăn Êpul hgŭm gru bi kal hrah să, 500 hdruôm hră dưi mđup brei kơ phung hđeh êlâo kơ thŭn hriăm mrâo. Hlăm anăn, mâo ĕ Ksor H'Yang ti ƀuôn Ksing êrĭt ama, adei hdĭp hŏng aê Siu Got:

"Kâo pô khăp snăk kơ knuă druh Đạt. Ñu jing sa čô mnuih jĕ giăm, mprăp nanao đru kơ phung hđeh mâo klei hdĭp dleh dlan msĕ si anak čô hlăm gŏ sang. Êlâo kơ mphŭn pŏk thŭn hriăm mrâo, gŏ sang phung hđeh tinei dôk lu klei dleh dlan, ƀiădah kyua klei đru pral mơ̆ng ayŏng Đạt hŏng dŭm hdruôm hră leh anăn mnơ̆ng yua hriăm hră, phung hđeh mâo thiăm boh kdrŭt".

Klei jăk siam mơ̆ng mnuih ƀuôn sang alŭ wăl hŏng Thiếu tá Lại Văn Đạt amâo djŏ knŏng jing mnơ̆ng mđup brei, ƀiădah jing klei uêñ mĭn, jĕ giăm. Thŭn 2021, hlăm sa blư̆ ngă bruă ti krah wưng klei ruă COVID-19 dleh ktuê dlăng, Thiếu tá Đạt mbĭt hŏng êpul ngă bruă ƀuh sa čô mniê dôk kkiêng anak. Amâo dôk guôn ôh, ñu mbĭt hŏng ƀĭng mă bruă ba mniê anăn nao ti Sang êa drao să Phú Thiện. Amĭ kkiêng anak, Thiếu tá Đạt bi anăn kơ ĕ mniê jing Hạ Vy, hŏng klei čang hmăng "hạ cô-vít". Amĭ Em, aduôn ĕ brei thâo, thŭn anei Hạ Vy nao hriăm mẫu giáo, lŏ mâo mă mnơ̆ng mơ̆ng knuă druh Đạt.

Mnuih ƀuôn sang thâo kơ ayŏng Đạt êlâo dih tuôm hdĭp ti ƀuôn anei leh anăn jing anak amĭ Biên. Grăp blư̆ wĭt čuă ƀuôn, ñu kreh djă ba hdruôm hră čiăng mđup brei kơ phung hđeh điêt. Hlăm ênoh phung hđeh dưi đru mâo ĕ Hạ Vy. Anei jing sa bruă ngă yuôm bhăn leh anăn djŏ mmông. Truh kơ ară anei, ñu ăt lŏ dơ̆ng hluê ngă lu bruă đru, mđup brei mnơ̆ng dhơ̆ng hriăm hră kơ phung hđeh."

Mơ̆ng dŭm gưl wĭt kơ ƀuôn sang, Thiếu tá Lại Văn Đạt mkŏ mjing hla pŏk Facebook "Kahan ksiêm wĭt kơ ƀuôn sang", čih pioh dŭm pŏk rup knuă druh, lĭng kahan wĭt kơ nah gŭ, blŭ hrăm hŏng mnuih ƀuôn sang, ksiêm hriăm klei hdĭp leh anăn đru kơ mnuih ƀuôn sang. Leh hlăm brô tlâo hruê kăm, giăm 60 clip dưi ba mdah, mâo giăm 9.000 čô tui ksiêm. Dŭm clip mâo giăm 500 êbâo čô dlăng. Thiếu tá Lại Văn Đạt lač, rup phung kahan ksiêm dôk jĕ giăm êdi hŏng mnuih ƀuôn sang, dôk mbĭt hŏng mnuih ƀuôn sang, blŭ klei mnuih ƀuôn sang, mđing hmư̆ mnuih ƀuôn sang leh anăn kah mbha hŏng mnuih ƀuôn sang.

"Êpul kahan ksiêm hmei snăn mâo "6 klei Awa Hô mtă kơ kahan ksiêm yang ƀuôn". Hlăm anăn, mtă kơ hmei jing bi mpŭ nanao leh anăn mpŭ kơ mnuih ƀuôn sang, sĭt suôr hŏng Đảng, Knŭk kna; hŏng mnuih ƀuôn sang, hmei bi mpŭ, mpŭ kơ mnuih ƀuôn sang. Anei ăt jing sa klei bi klă dŭm klei mtô mơ̆ng Awa, ăt msĕ mơh klei bi lông ktưn "Tlâo klei bi hmô" mơ̆ng Phŭn bruă kahan ksiêm, hlăm anăn mâo "Jĕ giăm mnuih ƀuôn sang hĭn".

Mđrăm mbĭt hŏng gru hmô "Kahan ksiêm truh kơ ƀuôn" jing mniê êra Jari Rah Lan Wĩ, ti Plei Kte Lớn A, să Phú Thiện, čar Gia Lai. Jing sa hlăm dŭm pô mkŏ mjing klei čih "dŭm êklăk pŏk rup" mơ̆ng ƀuôn sang, Rah Lan Wĩ đru kơ Lại Văn Đạt lŏ čih pioh dŭm pŏk rup klă sĭt, jăk siam:

“Ayŏng Đạt jing knuă druh kahan ksiêm mnuih ƀuôn sang jĕ giăm êdi hŏng mnuih ƀuôn sang čiăng hâo hưn, mtrŭt mjhar mnuih ƀuôn sang hluê ngă hdră êlan mtrŭn mơ̆ng Đảng leh anăn Knŭk kna. Hlăm hdră anăn, ayŏng Đạt čŏng êmuh nanao kơ kâo dŭm klei blŭ hŏng Jarai čiăng bi blŭ hrăm hŏng mnuih ƀuôn sang jăk hĭn. Grăp blư̆ wĭt kơ ƀuôn, mnuih ƀuôn sang khăp čiăng êdi kơ ayŏng Đạt; nao ti anôk, mnuih ƀuôn sang ăt pĕ hla hbei ƀlang ngă mnơ̆ng mđup brei. Kyua klei gĭr ktưn tui hriăm klei Jarai kyua anăn ayŏng Đạt thâo săng êdi klei mĭn mnuih ƀuôn sang”.

Mơ̆ng dŭm bruă ngă siă suôr, jĕ giăm hŏng mnuih ƀuôn sang, Thiếu tá Lại Văn Đạt leh anăn ƀĭng kahan să Phú Thiện, čar Gia Lai dôk bi sĭt klei Awa Hô mtă kơ kahan ksiêm yang ƀuôn: mpŭ, thâo kơ mnuih ƀuôn sang, bi mguôp hŏng mnuih ƀuôn sang. Hriăm klei blŭ mnuih ƀuôn sang, wĭt hŏng ƀuôn sang, mđing hmư̆ leh anăn kah mbha hŏng mnuih ƀuôn sang, čiăng kơ rup kahan ksiêm ƀrư̆ hruê ƀrư̆ jĕ giăm hŏng mnuih ƀuôn sang, thâo săng mnuih ƀuôn sang leh anăn kyua mnuih ƀuôn sang ngă bruă./.