Grăp blư̆ hlăm mlan 8, klei bi hdơr kơ sa yan 8 hƀuê ênuk lŏ wĭt hlăm phung tuôm nao leh hlăm klei bi blah. Hŏng kahan êka êkeh Đinh Kim Anh, ti ƀuôn hgŭm Ea Kao, čar Dak Lak, klei yuôm bhăn mơ̆ng klei êngiê, klei êđăp ênang dưi bi mlih hŏng dŭm thŭn mlan êdam êra leh anăn wăt êrah mơ̆ng ƀĭng kahan. Thŭn 1972, leh djŏ klei pui ƀơ̆ng hlăm sa blư̆ nao drông anôk bruă cách mạng, ñu êka kjham leh anăn lĕ hlăm kngan phung roh. Êbeh 2 thŭn găn lu boh sang krư̆, ñu tŭ lu klei bi kmhal ktang phĭt ƀiădah gĭr amâo blŭ ôh, kyua tluôn ñu lŏ mâo dŭm anôk bruă cách mạng dưi bi êdah. Klei đru kơ Đinh Kim Anh hgao dŭm thŭn mlan anăn, đru kơ ñu krơ̆ng kjăp klei đăo knang jing klei yuôm bhăn mơ̆ng klei hnŭk êngiê, êđăp ênang - dŭm klei Khua gĭt gai Hồ Chí Minh bi mklă hlăm Hră hưn mthâo klei hnŭk êngiê, mphŭn mkŏ mjing ala čar Việt Nam Dân chủ Cộng hòa.

“Amâo mâo ôh klei yuôm hĭn kơ klei êngiê, Awa lač leh. Klei anăn jing yuôm bhăn snăk. Kyua anăn hlăm klei hdĭp kâo thâo knap mñai êdi, kƀah hra, kƀah braih, ƀơ̆ng knŏng hbei ƀlang, ƀiădah ăt đăo knang cách mạng tŭ jing. Klei anăn jing jăk êdi.”

Klei đăo knang anăn amâo djŏ knŏng đru kơ phung lĭng kahan dôk kjăp hlăm sang mnă, ƀiădah lŏ mtrŭt mjhar lu gưl phung êdam êra ruah êlan nao tơdah lăn čar dôk hlăm klei bi blah.

Thŭn 17 thŭn, êkei êdam Bùi Ngọc Thảo ti Diễn Châu, Nghệ An čŏng nao mŭt kahan, jing lĭng kahan kahan ksiêm êa ksĭ leh anăn nao hlăm kdrăn mblah kwar Krah. Mâo phung ƀĭng kahan amâo lŏ wĭt, mâo dŭm klei bi blah luič liê kjham, ƀiădah hlăm ai tiê lĭng kahan mda asei hlăk anăn ăt jing klei čang hmăng mtlaih êngiê ƀuôn sang, hluh lir lăn čar.

81 thŭn leh Hruê kgŭ krŭ kdơ̆ng Mlan Sa, lăn čar mŭt leh hlăm sa knhuang mdê hĭn. Mơ̆ng sa ala čar ƀun ƀin, krĭng ƀuôn sang, Việt Nam mkŏ mjing leh klei mjĕ giăm hŏng giăm 200 ala čar, krĭng lăn, hgŭm hlăm dŭm klei bi mguôp bruă duh mkra lehanăn hdră mkra mjing tar rŏng lăn, ƀrư̆ ƀrư̆ bi mklă kơhưm mơ̆ng sa hdră duh mkra mbruă hlăm alŭ wăl.

Tơdah ênuk gưl êlâo bi blah čiăng sua mă klei êngiê, čŏng pô kơ djuê ana, snăn hruê anei, klei čang hmăng anăn dưi lŏ čuê hlăm sa bruă klam mrâo: mkŏ mjing sa Việt Nam êđăp ênang, êngiê, mdrŏng sah, mâo djăp ai dưi čiăng ñŭ kma leh anăn bi ktưn hlăm sa tar rŏng lăn lu klei bi mlih.

Lŏ dlăng wĭt hdră êlan anăn, Bùi Ngọc Thảo, ară anei dôk hdĭp ti ƀuôn hgŭm Ƀuôn Ama Thuôt, čar Dak Lak, lač dŭm boh tŭ yuôm mơ̆ng Hdră krŭ kgŭ kdơ̆ng Mlan Sa ăt jing tur knơ̆ng čiăng kơ lăn čar mŭt hlăm wưng đĭ kyar mrâo.

“Msĕ si klei khua gĭt gai Đảng Tô Lâm lač, drei mŭt hlăm ênuk kpưn đĭ mơ̆ng djuê ana, jing sa ai ktang mơ̆ng tur knơ̆ng knhuah gru krŭ kdơ̆ng Việt Nam. Mơ̆ng knhuah gru mâo sa amâo mâo djŏ anei čiăng kơ drei phiơr kbưi dlông hĭn.”

Hŏng ênuk gưl hđeh ară anei, klei hriăm mơ̆ng yan mdei prŏng thŭn 1945 kyua anăn amâo djŏ knŏng dôk hlăm dŭm pŏk hră hƀuê ênuk. Ti Dak Lak, bruă Đoàn bi mklă mtô mjuăt knhuah gru čiăng đru kơ phung êdam êra thâo săng klei yuôm bhăn mơ̆ng klei êđăp ênang, mpŭ kơ boh tŭ dưn mâo aê ama săn leh hŏng klei săn asei leh anăn yuôm bhăn hĭn jing bi mlih klei ktưn hưn jing bruă ngă.

Hdră ngă ăt dưi mlih mrâo hluê hdră jĕ giăm hŏng phung êdam êra hĭn, mơ̆ng hla pŏk yang ƀuôn, video đŭt, podcast truh kơ dŭm hdră bruă kơ phŭn agha, bi tuôm hŏng phung thâo kơ hƀuê ênuk leh anăn lông ngă bruă klă sĭt. Mta kñăm amâo djŏ knŏng čiăng kơ phung mda asei thâo kơ hƀuê ênuk, ƀiădah čiăng mơ̆ng hƀuê ênuk mkŏ mjing klei thâo săng bruă klam hŏng ară anei leh anăn êdei anăp. Ayŏng Nguyễn Thao Giang, Kiăng khua bruă êdam êra čar Dak Lak kah mbha:

“Klei yuôm bhăn hĭn jing bi mguôp hƀuê ênuk hŏng klei hdĭp ară anei mơ̆ng phung êdam êra. Brei đru kơ phung hđeh thâo săng, klei yuôm bhăn mơ̆ng klei êđăp ênang hruê anei dưi mjuăt bi hriăm klei thâo săng bruă klam hŏng yang ƀuôn, ai tiê bi mguôp, dhar kreh bi blŭ hrăm hlăm êlan mạng. Mơ̆ng klei săn asei mơ̆ng dŭm ênuk gưl nao êlâo dưi krŭ wĭt ai tiê čŏng ngă bruă, duh myơr, bruă klam hŏng yang ƀuôn leh anăn hŏng êpul êya.”

Grăp ênuk gưl mâo sa hdră mdê mdê čiăng lŏ čuê ai tiê mơ̆ng yan mnga êngiê. Tơdah ênuk gưl aê ama pô yua ai tiê khăp kơ lăn čar, klei mĭn leh anăn klei săn asei čiăng sua wĭt klei êngiê, snăn ênuk gưl hruê anei brei bi mlih dŭm boh tŭ dưn anăn jing ai ktang mkŏ mjing lăn čar: hŏng klei thâo mĭn čiăng dưi kiă kriê êdei anăp, hŏng klei mbruă čiăng mjing dŭm boh tŭ dưn mrâo, hŏng bruă klam čiăng răng mgang boh tŭ dưn mơ̆ng dŭm ênuk gưl nao êlâo.

Anăn ăt jing hdră ai tiê Cách mạng Mlan Pŭr lŏ hdĭp hlăm ară anei, amâo djŏ knŏng hlăm dŭm pŏk hră hƀuê ênuk lŏ wĭt lač grăp mlan Pŭr, ƀiădah hlăm klei ngă bruă, klei hmăng hmưi leh anăn dŭm klei đru mguôp klă klơ̆ng mơ̆ng grăp čô mnuih Việt Nam hruê anei.