Hŏng mnuih ƀuôn sang dŭm djuê ana, Têt Hnŭk êngiê amâo djŏ knŏng jing wưng lŏ bi hdơr kơ knhuah gru, hdơr knga kơ dŭm gưl aê ama, ƀiădah lŏ jing boh kdrŭt čiăng bi mguôp, mđĭ kyar ƀuôn sang. Ti Wăl knhuah gru h ƀuê ênuk ala čar Čư̆ 722 - Dak Săk, čar Lâm Đồng, dŭm hruê mlan 8 lŏ bi hdơr kơ dŭm klei bi blah ktang phĭt mơ̆ng lĭng kahan leh anăn mnuih ƀuôn sang alŭ wăl hlăm dŭm thŭn 1965 - 1975, boh nik jing Hdră mblah Đức Lập yan hla luh thŭn 1968. Hŏng Y Dơi, kahan hđăp mnuih M'nông, ti ƀuôn Dak Săk, klei bi hdơr kơ klei bi blah ăt dôk nanao..

“Kâo nao kahan mơ̆ng thŭn 18 thŭn,. Dŭm thŭn bi blah Mi, hmei hdĭp hlăm dliê ti Dak Prĭ, Nâm Nung, mâo wưng nao truh kơ Campuchia. Ară anei adôk hdĭp, dưi drông hruê mkŏ mjing ala čar, dlăng ƀon ƀuôn bi mlih, anak čô mâo klei hdĭp jăk hĭn, kâo mơak êdi. Kâo mâo Phŭn bruă lĭng kahan rŭ mdơ̆ng sang anei, grăp mlan dưi đru 6/7 êklăk prăk, ƀĭng kahan amâo lŏ dưi ƀuh hruê êngiê. Hdĭp hlăm klei êđăp ênang, kâo ƀuh yuôm bhăn hĭn leh anăn lŏ hdơr kơ ƀĭng kahan săn leh asei mlei.

Mơ̆ng klei hơ̆k mơak hruê mkŏ mjing ala čar, mnuih ƀuôn sang dŭm djuê ana Lăn Dap Kngư ƀrư̆ ƀuh klă hĭn dŭm klei bi mlih hlăm klei hdĭp. Ti să Ia Tul, čar Gia Lai, lu hdră bruă nah gŭ dôk pŏk ngă msĕ si êlan phŭn mkŏ êlan dơ̆ng prŏng mrô 25 hŏng wăl krah să, hdră mkăp êa doh ti ƀuôn Biah A, êlan bê tông xi măng hlăm krĭng ƀuôn sang nao kơ anôk pla mjing ƀuôn Tơ Khế. Dŭm bĭt êlan mnuôr mđoh êa, kban êran hŏng pui kmlă, mbông mđoh êa ti dŭm ƀuôn Tơ Khế, Bôn Biah A, Bôn Biah B ăt dưi duh bi liê, đru mdrơ̆ng hŏng klei êngăp êa, mkăp kơ bruă pla mjing. Nay Hao, mnuih mâo kơhưm ti ƀuôn Jư̆, să Ia Tul, lač kơ klei yuôm bhăn mơ̆ng hruê mkŏ mjing ala čar:

"Hruê mkŏ mjing lăn čar 2/9, hruê Awa Hồ dlăng hră hưn mthâo klei hnŭk êngiê, leh anăn anei jing nanao hruê knăm yuôm bhăn mơ̆ng djuê ana drei. Mâo klei hnŭk êngiê kơh dưi mâo klei hdĭp êđăp ênang, trei mđao leh anăn jăk mơak msĕ si ară anei. Kâo ƀuh lăn čar drei hlăk dôk kpưn đĭ ktang phĭt, pŏk mlar klei bi hgŭm hŏng tar rŏng lăn. Dŭm thŭn giăm anei, kyua mâo lu hdră êlan đru djŏ guôp, ai tiê bi hgŭm mguôp hlăm êpul êya ƀrư̆ hruê ƀrư̆ kjăp. Mnuih ƀuôn sang grăp čô sa ai tiê tui hlue hdră êlan mơ̆ng Đảng, hrăm mbĭt duh ƀơ̆ng mđĭ kyar bruă duh mkra čiăng mkŏ mkra ƀuôn sang pô mdrŏng siam."

Ti alŭ Kdăng, să Anh hùng Kdang, čar Gia Lai, anôk mâo 256 gŏ sang mnuih Bahnar, ai êwa drông hruê mkŏ mjing ala čar mčhĭt muăt. Dŭm hla čhiăm gru ala čar dưi yuôl ti anăp grăp gŏ sang. Mnuih ƀuôn sang lŏ mkŏ mjing dŭm hdră mjuăt ktang asei mlei, mjing ai êwa hơ̆k mơak, bi hgŭm mguôp hlăm êpul êya. Xuin, mnuih ƀuôn sang ƀuôn Kdăng, lač:

“Wưng knăm mơak hruê 2/9, gŏ sang leh anăn jih ƀuôn kă hla čhiăm gru, mkŏ mjing klei mơak hruê mkŏ mjing lăn čar. Êlâo kơ hruê knăm, grăp gŏ sang đru mguôp ƀiă čiăng blei sa drei ŭn leh anăn mprăp kpiê čeh čiăng hơ̆k mơak hruê knăm prŏng anei, hơ̆k mơak, êđăp ênang leh anăn bi mguôp klei khăp ƀuôn sang. Thŭn anei ƀuôn mkŏ mjing klei čưng boh ti ƀuôn wăt êpul čưng boh phung êdam êra leh anăn hđeh điêt jing mơak snăk; mjing klei hơ̆k mơak, hur har hriăm hră kơ phung hđeh leh dŭm hruê knăm mơak.