Mơ̆ng akŏ thŭn truh kơ ară anei, khădah tač êdeh phiơr Liên Khương brei mdei êjai klei ngă bruă čiăng mkra mđĭ, bruă hiu čhưn ênguê Lâm Đồng ăt drông giăm 12 êklăk gưl čô tuê, hnư hrui wĭt đăo tĭng mâo êbeh 33 êbâo êklai prăk. Dŭm ênoh mrô anăn brei ƀuh klei iêo jak mơ̆ng krĭng lăn mrâo ăt prŏng êdi. Ƀiădah, ti tluôn dŭm ênoh mrô đĭ kyar jing sa klei êmuh ka mâo klei wĭt lač. Anăn jing si srăng ngă čiăng dưi mđĭ lar klei găl mơ̆ng krĭng lăn Đà Lạt, čư̆ čhiăng Dak Nông leh anăn êa ksĭ mtah Bình Thuận čiăng krơ̆ng phung tuê lu hruê hĭn.

Ƀuh klei găl leh bi mŭt mbĭt, lu knơ̆ng bruă hiu čhưn ênguê pral mkŏ mjing dŭm tuôr hiu čhưn hlăm alŭ wăl. Aguah ưm dlăng yang hruê dơ̆ng ti êa ksĭ Mũi Né - Tlam hiu čhưn hlăm ƀuôn prŏng Đà Lạt - Hruê êdei đĭ kayak ti ênao êa Tà Đùng. Sa hdră hiu čhưn mĭn dah jăk êdi, ƀiădah tơdah ngă bruă, amâo djŏ ƀiă ôh knơ̆ng bruă tuôm hŏng klei dleh dlan: êlan klông. Hoàng Công Định, Khua knơ̆ng bruă duh mkra mnia mblei leh anăn hiu čhưn ênguê Dima Tour, brei thâo:

“Klei yuôm bhăn hĭn jing pral dưi mđĭ kyar anôk bruă êlan klông tơdah amâo mâo ôh dleh snăk dưi bi mguôp dŭm tour plah wah 3 krĭng Mũi Né- Đà Lạt- Dak Nông. Êlan dơ̆ng dôk tuôm hŏng lu klei dleh dlan. ăt hmăng hmưi mâo sa êlan dơ̆ng mơ̆ng Dak Nông truh kơ Đà Lạt, Mũi Né dưi mđĭ kyar pral hĭn čiăng mkŏ mjing lu tour êlan dưi nao hlăm brô 3 truh kơ 5 hruê kơ tuê hiu čhưn ênguê snăn găl hĭn”.

Amâo djŏ knŏng anôk bruă duh mkra, ƀiădah phung tuê hiu čhưn ênguê ăt ƀuh klă dŭm klei kpăk đuôm anăn. Dŭm anôk klưh hroh, dŭm taluy klưh, lăn boh tâo dôk dơ̆ng ti êlan leh hjan ngă kơ hdră hiu čhưn ênguê dưi hmăng hmưi jing êlan mkŏ jăk siam plah wah êa ksĭ leh anăn čư̆ čhiăng lŏ jing klei rŭng răng hŏng lu mnuih. Akŏ mlan 7 mrâo êgao, hlăm gưl nao mơ̆ng Phan Thiết truh kơ Đà Lạt leh anăn lŏ wĭt hluê êlan dơ̆ng mrô 28, 55, 28B, amai Triệu Thị Hồng Phúc lu blư̆ bi hrŏ hnơ̆ng êran ti anăp dŭm anôk klưh hroh ktuê êlan.

 “Mâo 4, 5 anôk, hjan angĭn jing êbuh yơh. ƀuh huĭ. Bi êlan nah anei jing čiăng êbuh jih yơh anăn yơh. Lăn, boh tâo, čuah hjan lĕ yơh. Dŭm bĭt êlan krĭng čư̆ čhiăng, kčŭn čư̆ mâo dŭm anôk êbuh anăn pô bi mkra bi kjăp dŭm anôk čư̆ brei ñu êđăp ênang yơh lui dlăng huĭ snăk. Dŭm anăn mđiă nao dưi ƀiădah hjan nao amâo dưi ôh amâo jhŏng nao ôh.”

Ti wăl krah Đà Lạt, anôk dưi dlăng jing "kiê kngan" mơ̆ng bruă hiu čhưn ênguê Lâm Đồng, ăt dôk lu anôk êdu awăt ngă kơ amâo djŏ ƀiă ôh mnuih ênguôt hnĭng. Dăl êbeh sa thŭn êgao, kdrăp pui mtrang mngač ti kčŭn čư̆ Prenn - ƀăng jang phŭn nao mŭt Đà Lạt wăt kdrêč dlông amâo ngă bruă mlam lĕ hlăm klei mmăt. Djiêu ênao êa Xuân Hương, sa hdră bruă prŏng lu thŭn lui hơăi mang mjing klei bi knăl mdê hŏng klei čang hmăng kơ sa ƀuôn prŏng hiu čhưn ênguê mrâo mrang.

Anăn knŏng jing dŭm pŏk rup ênưih thâo ƀuh, klei năng bi mĭn hĭn dôk ti mnơ̆ng dhơ̆ng hiu čhưn ênguê. Đà Lạt lu tuê hiu čhưn. Ƀiădah tuê lŏ bi liê ka lu ôh. Nguyễn Văn Lộc, Khua knơ̆ng bruă dhar kreh, mjuăt asei mlei leh anăn hiu čhưn ênguê Lâm Đồng, ară anei jing Khua bruă Đảng ƀuôn hgŭm Xuân Hương - Đà Lạt, lač klă:

“Truh kơ Đà Lạt mmăt truh 9 mmông jing wĭt pĭt yơh, mă knŏng sa gưl mnăm êa ksâo êtak lăn đuic̆. Kyua anăn hnơ̆ng bi liê mơ̆ng bruă hiu c̆hưn ênguê Lâm Đồng drei jing ƀiă. Drei bi mlih klei mĭn ară anei ngă bruă hiu c̆hưn ênguê amâo dưi yap ôh ênoh mnuih sa mlan dŭm c̆ô tuê hriê hŏng Lâm Đồng. Drei kreh bi mklin c̆iăng hưn mdah bi jăk ƀiădah kâo mĭn brei bi mlih hlăm klei dlăng, tĭng yap boh sĭt mơ̆ng bruă hiu c̆hưn ênguê".

Truh kơ ară anei hdră tă mđĭ kyar mnơ̆ng dhơ̆ng hiu čhưn ênguê mlir krĭng leh bi mŭt čar lu jing dôk hlăm hră mơar; dŭm mnơ̆ng dhơ̆ng hiu čhưn ênguê mkŏ krĭng čư̆ čhiăng - čư̆ dliê kmrơ̆ng - ƀuôn prŏng ktuê hang ksĭ lu jing dôk hlăm klei găl; ka mkŏ mjing klă dŭm ktuê êlan, hdră mnơ̆ng dhơ̆ng mdê hjăn mâo ai bi ktưn prŏng plah wah dŭm krĭng. Hồ Văn Mười, Khua hlăm bruă Đảng gưl dlông, Kiăng khua bruă Đảng čar, Khua knơ̆ng bruă sang čư̆ êa čar Lâm Đồng, lač klă:

“Drei bi mklă bruă hiu čhưn ênguê jing sa hlăm tlâo kmeh gơ̆ng phŭn mơ̆ng bruă duh mkra êdei kơ mnơ̆ng gŭ lăn, pui kmlă leh anăn bruă lŏ hma kdrăp mrâo. Ƀiădah kâo ƀuh jing ka mâo sa klei bi tŭ ư leh anăn ka dưi mkŏ mjing kjăp, bi mguôp hŏng knŭk kna, Knơ̆ng bruă dhar kreh, mjuăt ktang asei mlei leh anăn hiu čhưn ênguê, dŭm alŭ wăl čiăng kơ dưi mjing boh kdrŭt kơ bruă hiu čhưn ênguê".

Bi mŭt mbĭt pŏk leh sa wăl anôk đĭ kyar mrâo, ƀiădah bruă hiu čhưn ênguê Lâm Đồng čiăng lu hĭn dŭm klei mĭn jăk amâodah dŭm ênoh mrô đĭ kyar. Knŏng tơdah anôk bruă nah gŭ dưi mkŏ, mnơ̆ng dhơ̆ng dưi mkra mrâo, lehanăn dŭm alŭ wăl hrăm mbĭt sa hdră êlan, klei hiu čhưn dlăng krĭng lăn mrâo amâo djŏ knŏng sui hĭn, ƀiădah lŏ dưi krơ̆ng phung tuê hiu čhưn.