Ti Wăl anôk bruă duh mkra Vân Phong, dŭm hdră bruă mrâo hlăm bruă tuh tia mkra mjing dôk pŏk thiăm klei găl kơ hdră mkra mjing. Mbĭt hŏng Sang maĭ mkra kŭm păn HD Hyundai Việt Nam, ti anei dôk pŏk ngă Hdră bruă Sang maĭ mkra mnơ̆ng đŭng kŭm păn mơ̆ng Miboo Vina, ênoh duh bi liê 528 êklai prăk, dưi hmăng hmưi thiăm mbŏ ai dưi kơ bruă mkra kŭm păn. Nguyễn Văn Trãi, Khua gĭt gai Miboo Vina, brei thâo:

“Lu jing bruă mkŏ mkra, mkra mjing, khăt msei snăn phŭn tal êlâo ăt jing kỹ sư Việt Nam, phung ngă bruă phŭn ăt lu jing mnuih Việt Nam. Ară anei pô ngă bruă anăn ăt jăk mơh. Sa kdrêč mkra mjing dưi ngă ti nah êngao, bi êlâo dih arăng ngă jih hlăm sang maĭ Hyundai. Ară anei hnơ̆ng ngă bruă diñu amâo mâo djăp ôh, hmei ba kdrêč mkra mjing čiăng kơ diñu lŏ mkŏ mjing pral hĭn, mđĭ ênoh kŭm păn hlăm sa thŭn.”

Mbĭt hŏng bruă mkŏ mkra, bruă tuh tia, bruă hiu čhưn ênguê lŏ dơ̆ng jing boh kdrŭt prŏng mơ̆ng klei đĭ kyar. 9 mlan, Khánh Hòa drông êbeh 20.4 êklăk gưl čô tuê, tuê ala tač êngao êbeh 7.1 êklăk gưl čô; hnư hrui wĭt giăm 68.000 êklai prăk, đĭ 21%. Festival Êa ksĭ Khánh Hòa 2026, Hruê knăm Dhar kreh djuê ana Čam tal VI leh anăn Miss World 2026 mjing dŭm klei êdah kdlưn, đru hưn mdah rup, dhar kreh leh anăn mnơ̆ng dhơ̆ng hiu čhưn ênguê mơ̆ng čar. Bruă hiu čhưn ênguê đĭ 2 ênoh mrô ba klei đĭ kyar bruă nah tluôn, dŭ mdiăng, mnia mblei mơ̆ng dŭm alŭ wăl. Thái Thị Lệ Hằng, Khua knơ̆ng bruă dhar kreh, mjuăt ktang asei mlei leh anăn hiu čhưn ênguê čar Khánh Hòa, brei thâo, bruă hiu čhưn ênguê ăt lŏ dơ̆ng jing bruă duh mkra phŭn mơ̆ng Khánh Hòa hlăm dŭm mlan kơ anăp:

"Čang hmăng anăp anei srăng drông sa êpul tuê China prŏng êdi, lŏ mâo dŭm êpul tuê mkăn mơ̆ng dŭm ala čar mkăn; wăl anôk mnia mblei hlăm ala čar ăt dưi mđing dlăng. Knơ̆ng bruă srăng lŏ tui duah dŭm ƀĭng hgŭm čiăng mkŏ mjing thiăm lu bruă ngă, lu hdră kñăm mtrŭt mđĭ bruă hiu čhưn ênguê, hlăm anăn ăt mđing kơ dhar kreh jing boh kdrŭt mơ̆ng bruă duh mkra hiu čhưn ênguê, mđĭ kyar thiăm lu mta mnơ̆ng dhơ̆ng hiu čhưn ênguê mdê hjăn."

Kơ dŭm klei êdu kƀah, hnơ̆ng đĭ kyar 8,7% mơ̆ng bruă tuh tia mkra mjing jing ƀiă hĭn hdră kčah. Ênoh bi liê logistics, klei bi mlih anôk mnia mblei tar rŏng lăn leh anăn bi kna phŭn pui kmlă lŏ dơ̆ng ngă klei kpĭ kơ bruă tuh tia mkra mjing mơ̆ng alŭ wăl. Čiăng bi djŏ guôp hŏng boh klei mrâo, dŭm anôk bruă duh mkra akâo mâo hdră mtrŭn mđing kơ bruă tuh tia mkra mjing, mkra mjing mâo ênoh yuôm, mđĭ kyar bruă tuh tia mkra mjing đru leh anăn ruh mgaih klei dleh dlan kơ dŭm bruă đĭ kyar êmưt. Trịnh Thị Hồng Vân, Khua knơ̆ng bruă Yến sào Khánh Hòa brei thâo, khă gơ̆ čang hmăng mâo hdră mtrŭn đru kơ bruă mkra mjing, anôk bruă duh mkra ăt dlăng klei gĭr mơ̆ng pô jing phŭn:

"Hlăm boh klei čar dôk dleh dlan msĕ snei, kơ ênoh mrô bruă duh mkra, knơ̆ng bruă ăt srăng gĭr čiăng mâo hnơ̆ng đĭ kyar hlăm brô 30 -35%, leh anăn srăng gĭr hluê ngă mta kñăm anei."

Hluê si Nguyễn Việt Hùng, Khua knơ̆ng bruă sang čư̆ êa čar Khánh Hòa, hnơ̆ng đĭ kyar mơ̆ng alŭ wăl ăt dôk ti hnơ̆ng hơĭt. Truh kơ ară anei, čar mrâo bi liê ngăn prăk bruă knŭk kna mâo 70%, msir mghaih leh 106/257 hdră bruă tuôm hŏng klei gun kpăk. Tơdah bi liê 100% leh anăn msir mghaih thiăm hdră bruă, Khánh Hòa srăng krơ̆ng kjăp hnơ̆ng đĭ êbeh 11% mơ̆ng 9 mlan. Nguyễn Việt Hùng lač, hnơ̆ng đĭ kyar lu êdi, ƀiădah hnơ̆ng đĭ kyar dôk knang kơ ai dưi hluê ngă mơ̆ng bruă kđi čar:

“Lu bruă phŭn mơ̆ng gưl dlông dôk mđing, yuôm bhăn hĭn jing drei dưi mlih mơ̆ bruă anei? Bruă klam mơ̆ng drei jing ruh mgaih anôk ala, anei jing tur knơ̆ng čiăng kơ hdră bruă dưi bi sĭt hdră čuăl mkă. Bruă duh bi liê jing drei đĭ kyar, ƀiădah klei đĭ kyar lu jing kyua ai dưi hluê ngă. Dleh dlan snăn ayŏng adei drei hrăm mbĭt ruh mgaih.”

Boh tŭ 9 mlan mjing leh tur knơ̆ng čiăng kơ Khánh Hòa bi leh mta kñăm đĭ kyar 2 ênoh mrô thŭn 2026. Bruă kơ anăp jing bi mlih ai dưi duh bi liê, mkra mjing, hiu čhưn ênguê leh anăn klei găl Vân Phong jing ai dưi đĭ kyar klă sĭt, hơĭt kjăp.