Hluê si klei hưn, 6 mlan akŏ thŭn, hnơ̆ng mâo mnơ̆ng dhơ̆ng kluôm ti alŭ wăl čar Khánh Hoà (GRDP) đĭ 9.03%, dôk tal 14/34 čar, ƀuôn prŏng leh anăn dôk tal dua krĭng ktuê hang ksĭ Dhŭng kwar Krah- Lăn Dap Kngư. Ba wĭt ngăn prăk kơ knŭk kna giăm 28.000 êklai prăk, bi leh êbeh 80% hdră kčah thŭn, wăl anôk duh bi liê lŏ dơ̆ng mkra mđĭ, dŭm mta bruă dhar kreh, yang ƀuôn, klei êđăp ênang mâo mđing dlăng, bruă lĭng kahan-răng mgang klei êdăp ênang dưi rơ̆ng kjăp. Khă snăn, lu phung bi ala lač, ti tluôn dŭm ênoh mrô jăk ăt dôk mâo dŭm bruă čiăng dlăng klă nik čiăng rơ̆ng klei đĭ kyar hơĭt kjăp hlăm dŭm thŭn kơ anăp. Pô bi ala Phan Gia Ngọc, K’iăng khua Anôk bruă hdră bhiăn, Êpul gơ̆ng bruă ƀuôn sang čar Khánh Hoà mblang:

“Hnư hrui wĭt ngăn prăk thŭn anei mâo giăm 27.930 êklai prăk ƀiădah êbeh 14.000 êklai, mâo êbeh 53%, kbiă hriê mơ̆ng prăk yua lăn leh anăn prăk mưn lăn. Anei jing hnư hrui wĭt sa blư̆ , hlăk êjai anăn, ênoh hrui mơ̆ng anôk bruă duh mkra knŭk kna leh anăn bruă duh bi liê êngao ala čar lŏ hrŏ trŭn. Dưi lač, bruă duh mkra Khánh Hoà dôk jưh knang kơ keh lăn mâo knhal hrô kơ mkŏ mjing boh tŭ kjăp mơ̆ng bruă mkra mjing, mnia mblei.”

Hluê si lu phung bi ala, anei jing klei hưn brei răng năng mđing kyua hnư hrui mơ̆ng lăn amâo dưi bi kdung sui ôh. Čiăng dưi krơ̆ng hnơ̆ng đĭ kyar ktang, čar čiăng lŏ dơ̆ng ruh mgaih dŭm hdră bruă kpăk đuôm, iêo jak dŭm anôk bruă duh bi liê nao hlăm hdră ngă bruă tŭ dưn, mđĭ kyar kjăp wăl anôk mnia mblei, bruă tuh tia mkra mjing, hdră bruă leh anăn hiu čhưn ênguê čiăng mkŏ mjing hnư hrui wĭt hơĭt, sui kơ ngăn prăk. Amâo djŏ knŏng mđing kơ hnơ̆ng prăk mâo hrui wĭt, lu phung bi ala ăt êmuh kơ bruă mkăp brei klei găl čiăng kơ mnuih ƀuôn sang, boh nik mnuih tuôm hŏng klei hmăi mơ̆ng dŭm hdră bruă dưi dưn klă klơ̆ng hĭn mơ̆ng boh tŭ đĭ kyar. Võ Nam Thắng, Khua bruă Đảng ƀuôn hgŭm Đông Ninh Hòa, čar Khánh Hòa lač.

“Čiăng mđĭ hĭn boh tŭ ba wĭt, bi liê ngăn prăk, rơ̆ng klei bi liê bi hơĭt klei hdĭp yang ƀuôn, boh nik jing đru mlih bruă mă, duh bi liê mđĭ hnơ̆ng bruă mdrao mgŭn, sang hră mơar ti nah gŭ. Phung bi ala hmăng hmưi dŭm boh tŭ bruă duh mkra anei dưi bi mbha, bi klă hĭn hlăm dŭm hdră êlan bi hơĭt yang ƀuon, đru kơ mnuih ƀuôn sang, boh nik jing phung hmăi djŏ mơ̆ng klei hrui wĭt lăn čiăng mđĭ kyar bruă tuh tia, ƀuôn prŏng.”

Mbĭt hŏng klei hmăng hmưi kơ anôk bruă nah gŭ leh anăn klei găl mđĭ kyar, mnuih ƀuôn sang čang hmăng hnư hrui wĭt mơ̆ng lăn srăng dưi lŏ duh bi liê hlăm sang hră, sang êa drao, êlan klông, knơ̆ng kdơ̆ng êa, mtô mjuăt bruă mă, mkŏ mjing bruă mă leh anăn dŭm hdră êlan đru hdră duh ƀơ̆ng leh hrui wĭt lăn, čiăng boh tŭ klei đĭ lar bi bi lar truh hŏng êpul êya.

Knơ̆ng Bruă sang čư̆ êa čar Khánh Hòa brei thâo hlăm 6 mlan knhal jih thŭn, alŭ wăl ktưn bi mâo hnơ̆ng đĭ kyar GRDP ƀiă êdi 11.2%, mơ̆ng anăn bi leh mta kñăm klei đĭ kyar kluôm thŭn mơ̆ng 10/11%. Čiăng dưi bi sĭt mta kñăm anei, čar srăng kƀĭn mđĭ pral klei brei čan duh bi liê bruă knŭk kna; ruh mgaih dŭm hdră bruă dôk kpăk đuôm; mđĭ lar boh tŭ dưn pă boh kdrŭt đĭ kyar; mđĭ hnơ̆ng jăk ba yua gru hmô bruă sang čư̆ êa alŭ wăl dua gưl; mbĭt anăn mđing ai dưi kơ dŭm hdră êlan bi hơĭt klei hdĭp yang ƀuôn leh anăn dŭm bruă čiăng êdi. Châu Ngô Anh Nhân, Khua knơ̆ng bruă ngăn prăk čar Khánh Hòa, brei thâo, alŭ wăl mprăp mbha mđĭ hnư hrui wĭt ngăn prăk thŭn 2025 hŏng ênoh êbeh 10.000 êklai prăk, jing boh kdrŭt yuôm bhăn čiăng mđĭ kyar dŭm mlan knhal jih thŭn.

“Ênoh anei srăng dưi mbha kơ jih jang dŭm să, ƀuôn hgŭm čiăng bi mâo djăp klei čiăng duh bi liê kơ dŭm mta bruă čiăng êdi. Čar mđing tal êlâo duh bi liê kơ bruă sang hră mơar, bruă mdrao mgŭn đru kơ mnuih ƀuôn sang mbĭt anăn mđing mkăp prăk kơ dŭm hdră bruă phŭn, yuôm bhăn, boh nik jing dŭm bruă mkŏ mjing boh kdrŭt mđĭ kyar krĭng nah Dhŭng čar Khánh Hòa."

Dŭm boh tŭ đĭ kyar jăk hlăm 6 mlan akŏ thŭn jing tur knơ̆ng yuôm bhăn čiăng kơ Khánh Hoà kpưn đĭ. Ƀiădah čiăng mđĭ kyar hơĭt kjăp, čar čiăng bi mlih klei găl mâo mơ̆ng lăn jing boh kdrŭt sui kơ bruă mkra mjing, mnia blei leh anăn rơ̆ng kơ boh tŭ đĭ kyar dưi bi lar klă klơ̆ng truh hŏng klei hdĭp mnuih ƀuôn sang.

Những kết quả tăng trưởng tích cực trong 6 tháng đầu năm là nền tảng quan trọng để Khánh Hòa bứt phá. Tuy nhiên, để phát triển bền vững, tỉnh cần chuyển hóa nguồn lực từ đất đai thành động lực lâu dài cho sản xuất, kinh doanh và bảo đảm thành quả tăng trưởng được lan tỏa thiết thực đến đời sống người dân.