Ti Sang hră gưl sa Nha Trang, 13 boh sang hră dưi mkŏ mjing jing sa boh sang hră, mâo 1 boh sang hră phŭn, 12 boh sang hră mbha leh anăn 5 boh sang hră điêt, hŏng êbeh 10.500 čô hđeh hriăm hră. Êlan klông dơ̆ng mơ̆ng dŭm anôk ti lăn hang truh kơ dŭm boh sang hră ti dŭm plao ksĭ hlăm krĭng kplang Nha Trang.

Hŏng hnơ̆ng anei, sang hră ksiêm dlăng leh êpul ngă bruă hlăm kluôm sang hră, bi mlih phung nai mơ̆ng anôk djăp nao kơ anôk kƀah, boh nik dŭm klei hriăm thơ̆ng. Châu Đình Mai Phương, Khua sang hră gưl sa Nha Trang, brei thâo, bruă mkŏ dăp, bi mlih djŏ guôp tal êlâo đru kơ hnơ̆ng jăk mtô leh anăn hriăm ti sang hră.

“Msĕ msi klei hriăm Ăngle, êlâo dih ti dŭm anôk bruă mâo dŭm anôk hđeh sang hră brei tla prăk čiăng hriăm. Ƀiădah leh lŏ dăp wĭt, phung nai mâo êbeh ti anôk anei srăng dưi tiŏ nao kơ anôk dôk kƀah nai mtô, čiăng kơ hđeh sang hră dưi hriăm amâo mâo lŏ tla prăk ôh. Hŏng klei hriăm Tin học ăt msĕ mơh. Leh lŏ dăp wĭt, phung nai Tin học dưi bi kna, tiŏ nao kơ dŭm anôk bruă.”

Bruă kriê dlăng sang hră hnơ̆ng prŏng, hŏng lu anôk bruă ăt čiăng kơ anôk bruă mtô bi hriăm čar Khánh Hoà bi mlih hdră kriê dlăng. Khua sang hră mđing kơ dŭm boh klei mbĭt kơ bruă thơ̆ng, êpul êya leh anăn hnơ̆ng mtô bi hriăm; dŭm bruă dôk hlăm klei mbha sang hră, anôk bruă dưi jao kơ pô truăn kơ bruă msir mgaih ti anăp. Sang hră bi hrŏ dŭm klei bi kƀĭn klă anăp amâo čiăng êdi, mđĭ klei bi blŭ hrăm online leh anăn ba yua klei čih pioh yua mbĭt.

Ti gưl să, ƀuôn hgŭm, bruă sang čư̆ êa bi hgŭm rơ̆ng dŭm klei găl mkăp kơ hdră mtô leh anăn hriăm, boh nik anôk bruă nah gŭ, adŭ hriăm leh anăn msir mghaih dŭm boh klei mâo ti alŭ wăl. Vũ Ngọc Đương, Khua knơ̆ng bruă sang hră mtô bi hriăm čar Khánh Hòa brei thâo, dhar bruă lŏ dơ̆ng ksiêm dlăng êpul, bi mbŏ phung nai mtô ti dŭm anôk êbeh, kƀah, mbĭt anăn bi leh klei bhiăn mbha bruă, mbha gưl.

"Bruă kriê dlăng hluê hŏng kdrăp hâo hưn, hluê hŏng ênoh mrô, hluê hŏng klei bhiăn, klei kčah mtrŭn kơ klei mbha gưl, mbha klei dưi. Tơdah bi mŭt mbĭt, klei tŭ dưn mơ̆ng dŭm boh sang hră, dŭm anôk bi hriăm jing msĕ hlăm sa alŭ wăl să. Anei jing hdră ngă jăk êdi. Phung amĭ ama hđeh ăt tŭ ư lu mơh. Hrô kơ êlâo dih brei ruah sang hră, ruah dŭm sang hră jăk, snăn ară anei hlăm alŭ wăl să, hnơ̆ng tŭ jăk bruă mtô bi hriăm leh anăn anôk bruă nah gŭ dưi rơ̆ng bi knar hĭn".