Khua bruă kƀĭn ala bi mklă Việt Nam dlăng nanao Mi jing sa hlăm dŭm ƀĭng hgŭm yuôm bhăn tal êlâo; bi mni kơ dŭm knhuang đĭ kyar êdah êdi mơ̆ng klei bi mjĕ Ƀĭng hgŭm phŭn kluôm dhuôm Việt Nam - Mi hlăm djăp mta bruă hlăm wưng êgao. Khua bruă kƀĭn ala mtă kơ Pô bi ala Jennifer Wicks mđĭ lar bruă klam jing kdrông mkŏ, bi hgŭm hŏng ala čar Việt Nam mtrŭt mđĭ hĭn dŭm hdră bi tuôm, bi trông êpul hlăm dŭm gưl, boh nik mơ̆ng phung khua gưl dlông; mtrŭt mjing klei bhiăn bi blŭ hrăm jêñ jêñ, klă sĭt plah wah anôk bruă čih mkra hdră bhiăn dua ala čar.

Sa ai hŏng Khua bruă kƀĭn ala Trần Thanh Mẫn, Pô bi ala Jennifer Wicks lač boh tŭ dưn klei bi mjĕ dua ala čar ară anei mâo klei đru mguôp yuôm bhăn mơ̆ng klei mjĕ giăm plah wah dua bruă kƀĭn ala; bi myuôm dŭm boh tŭ dưn êdah êdi hlăm klei bi hgŭm plah wah bruă kƀĭn ala dua ala čar hlăm wưng êgao. Khua bi ala bi mklă mprăp bi hgŭm kjăp hŏng dŭm phŭn, dhar bruă, anôk bruă, alŭ wăl Việt Nam čiăng mtrŭt mđĭ klei bi trông êpul ti dŭm gưl leh anăn dŭm êlan; tŭ ư bruă dua tĭng hnưm bi leh klei blŭ hrăm, siñê Klei kuôl kă mnia mblei bi đru, mtăp mđơr; mñă klă sa ai mtrŭt mđĭ klei bi hgŭm hlăm dŭm mta bruă mrâo, hlăm anăn mơ̆ng Mi mđing êdi kơ klei bi hgŭm bruă pui kmlă, kreh knhâo - kdrăp mrâo, bi mlih mrô; tŭ ư leh anăn lŏ bi mklă klei ƀuăn mtrŭt mđĭ klei bi hgŭm msir mgaih boh jhat mơ̆ng klei bi blah./.