Blŭ hrăm hlăm klei kƀĭn trông, Khua bruă kƀĭn ala Trần Thanh Mẫn brei thâo, hlăm wưng păn bruă êlâo, Bruă kƀĭn ala gĭr ktưn bi leh klei bhiăn, truh ară anei mâo mkŏ mjing leh 122 klei bhiăn, hdră mtrŭn. Dŭm boh tŭ dưn dưi mâo hlăm wưng êgao jing tur knơ̆ng yuôm bhăn, ƀiădah klei čiăng mđĭ kyar mrâo mơ̆ng lăn čar dôk ba mdah dŭm klei čiăng kdlưn hĭn kơ bruă ksiêm dlăng. Bruă kƀĭn ala gưl 16 čiăng mkŏ mjing sa hdră ksiêm dlăng mrâo: mâo hnơ̆ng trah dlăng kluôm, čŏng đăo knăl, hluê hŏng klei hâo hưn leh anăn boh sĭt, mđing djŏ mta phŭn, nao truh kơ bruă klam leh anăn boh tŭ dưn.

Ksiêm dlăng amâo djŏ knŏng čiăng ksiêm dlăng bruă leh ngă, ƀiădah brei đru mguôp mkŏ mjing bruă čiăng ngă; amâo djŏ knŏng ƀuh klei êdu kƀah, ƀiădah brei ruh mtlaih klei gun kpăk, hưn brei răng kơ klei amâo jăk, mtrŭt mđĭ bruă ngă leh anăn mkŏ mjing klei đĭ kyar. Ênoh yuôm knhal tuč mơ̆ng bruă ksiêm dlăng jing mjing dŭm klei bi mlih klă sĭt hlăm bruă bi leh klei bhiăn, mkŏ mjing hluê ngă hdră bhiăn, mđĭ klei tŭ dưn kriê dlăng ala čar; lehanăn kdlưn hĭn jing mkăp kơ mnuih ƀuôn sang, kyua klei đĭ kyar pral, hơĭt kjăp mơ̆ng lăn čar./.