Leh Knăm tŭ drông, ti Sang knŭk kna, Khua bruă kƀĭn ala Trần Thanh Mẫn siñê hră tŭ drông. Khua bruă kƀĭn ala mñă, klei mjĕ giăm mâo mơ̆ng đưm Việt Nam - Mongol kyua Khua gĭt gai Hồ Chí Minh leh anăn dŭm gưl phung khua kiă kriê dua ala čar rŭ mdơ̆ng leh anăn ksul mbŭ găn leh êbeh 70 thŭn đĭ kyar jăk siam. Boh nik, bruă dua ala čar mkŏ mjing klei bi mjĕ Ƀĭng hgŭm kluôm dưi pŏk wưng bi hgŭm mrâo klă sĭt, tŭ dưn leh anăn kluôm dhuôm hlăm djăp mta bruă.

Khua bruă kƀĭn ala mñă klă, Bruă kƀĭn ala Việt Nam dlăng yuôm bhăn leh anăn mprăp mbĭt hŏng Bruă kƀĭn ala Mongol mđĭ hĭn klei bi trông êpul, bi hgŭm plah wah dŭm Dhar bruă, Êpul phung bi ala leh anăn phung bi ala mda asei; đru bi kjăp klei đăo knang bruă kđi čar, mtrŭt mđĭ klei bi hgŭm bruă duh mkra - mnia mblei, duh bi liê, dhar kreh, mtô bi hriăm leh anăn mjĕ mjuk mnuih ƀuôn sang kyua boh tŭ kơ mnuih ƀuôn sang dua ala čar, kyua klei êđăp ênang, hơĭt kjăp leh anăn đĭ kyar ti krĭng wăl leh anăn tar rŏng lăn.