Dua čô khua gĭt gai bi êdah klei hơ̆k mơak ti anăp klei đĭ kyar êlam, kluôm dhuôm leh anăn klă sĭt klei bi mjĕ Việt Nam - Mongol, boh nik mơ̆ng leh dua ala čar mkŏ mjing klei bi mjĕ Ƀĭng hgŭm kluôm dhuôm mơ̆ng gưl nao čhưn ala čar mơ̆ng Khua gĭt gai Đảng, Khua lăn čar Tô Lâm mlan 9/2024.

Dua tĭng bi tŭ ư lŏ dơ̆ng hyuă kjăp klei đăo knang kđi čar, krơ̆ng nanao klei bi tuôm gưl dlông leh anăn dŭm gưl hŏng lu hdră jăk găl; lŏ dơ̆ng mđĭ pŏk mlar klei bi hgŭm bruă hŏng tač êngao, bruă lĭng kahan, klei êđăp ênang; mtrŭt mđĭ klei bi hgŭm klă sĭt, hrăm mbĭt tŭ dưn, mơ̆ng anăn mjing klei bi mlih kdlưn hĭn kơ klei bi hgŭm bruă duh mkra, mnia mblei leh anăn duh bi liê, hlăm anăn mâo bruă mtrŭt mđĭ hnưm mkŏ mjing Klei bi kƀĭn tal 20 mơ̆ng Dhar bruă gưl dlông Việt Nam - Mongol; gĭr ktưn hnưm dưi mâo mta kñăm mđĭ ênoh prăk bi mnia mblei truh 200 êklăk USD; mtrŭt mđĭ klei bi hgŭm bruă kreh knhâo, hiu čhưn ênguê, bi mlih mrô, bruă pui kmlă doh, bruă pui kmlă mtah. Khua knŭk kna Mongol kčĕ bruă ksiêm duah, mtrŭt mđĭ klei bi trông hdră êlan dŭ mdiăng tlâo tĭng Việt Nam-Mongol-China čiăng mtrŭt mđĭ klei tŭ dưn, klă sĭt bi hgŭm hlăm bruă êlan klông dŭ mdiăng leh anăn logistics./.