Ti anôk drông, Khua bruă kƀĭn ala Trần Thanh Mẫn bi mklă gưl hriê čhưn mâo boh tŭ yuôm bhăn, đru bi êlam hĭn klei mjĕ giăm yuôm bhăn, bi hgŭm kjăp, bi mguôp kluôm dhuôm, bi mguôp hdră êlan Việt Nam - Lao. Khua bruă kƀĭn ala Trần Thanh Mẫn mñă klă mbĭt hŏng klei đĭ kyar jăk siam mơ̆ng klei bi mjĕ dua ala čar, klei bi mguôp plah wah bruă kƀĭn ala dua ala čar ƀrư̆ hruê ƀrư̆ dưi bi kjăp, krơ̆ng kjăp, tŭ dưn.

Dua čô khua gĭt gai čang hmăng, Bruă kƀĭn ala Việt Nam lehanăn Bruă kƀĭn ala Lào lŏ dơ̆ng bi trông, kah mbha klei hriăm hlăm bruă hluê ngă bruă čih mkra hdră bhiăn lehanăn ksiêm dlăng gưl dlông; ba klei bi mguôp plah wah dua anôk bruă čih mkra hdră bhiăn dua ala čar ƀrư̆ hruê ƀrư̆ mâo boh tŭ dưn hĭn, đru mguôp klă sĭt hlăm klei đĭ kyar mbĭt mơ̆ng klei bi mjĕ dua Đảng, dua ala čar.