Ti anôk bi tuôm, Khua bruă kƀĭn ala Trần Thanh Mẫn mñă klă, gưl nao čhưn mơ̆ng Êpul đru mguôp bi êlam hĭn Klei kuôl kă hgŭm bruă plah wah anôk bruă čih mkra hdră bhiăn dua ala čar (siñê thŭn 2024) lehanăn lŏ yuôm bhăn hĭn hlăm boh klei dua tĭng dôk gĭr pŏk ngă klei bi mjĕ Ƀĭng hgŭm kluôm dhuôm, Êpul êya kah mbha êdei anăp Việt Nam - China mâo boh tŭ yuôm hdră êlan.

Dua čô khua gĭt gai bi tŭ ư, klei găl, klei mâo lehanăn klei găl bi hgŭm plah wah dua ala čar, boh nik kơ bruă duh mkra, mnia mblei, duh bi liê dôk prŏng êdi. Dua tĭng bi tŭ ư brei thâo, Việt Nam lehanăn China ƀrư̆ hruê ƀrư̆ brei bi hgŭm, hrăm mbĭt, sa ai čiăng hluê ngă hdră êlan đĭ kyar yang ƀuôn ngă phŭn lehanăn mđĭ kyar lăn čar hlăm êdei anăp; mbĭt anăn, anôk bruă čih mkra hdră bhiăn dua ala čar brei mđĭ hdră bi hgŭm, kah mbha klei thâo čih mkra hdră bhiăn, ksiêm dlăng, kñăm mjing wăl hdră bhiăn ƀrư̆ hruê ƀrư̆ găl hĭn kơ klei mđĭ kyar bruă duh mkra lehanăn bi hgŭm dua ala čar.