Klă klơ̆ng, brei rơ̆ng hdră êlan, hdră bhiăn djŏ guôp hŏng boh sĭt, nao êlâo pŏk êlan kơ klei đĭ kyar, mă mnuih ƀuôn sang leh anăn anôk bruă duh mkra jing phŭn, mă hnơ̆ng tŭ jăk, boh tŭ dưn hluê ngă mơ̆ng hdră bhiăn jing hnơ̆ng mkă bruă mkŏ mjing hdră bhiăn. Khua bruă kƀĭn ala mñă klă, klei bi kƀĭn bi êdah klei gĭr mơ̆ng bruă kƀĭn ala, knŭk kna leh anăn dŭm anôk bruă hlăm bruă hmao bi klă dŭm hdră êlan mơ̆ng Đảng, mkăp djŏ hŏng klei čiăng mđĭ kyar lăn čar, amâo mâo lui klei kpăk đuôm, luič klei găl.

Khua bruă kƀĭn ala mtă kơ phung bi ala ksiêm dlăng klă klei hâo mdah, hur har bi trông, đru mguôp klei blŭ kơ dŭm boh klei adôk mâo klei blŭ mdê mdê, boh nik dŭm boh klei hmăi klă anăp hŏng mnuih ƀuôn sang leh anăn anôk bruă duh mkra; mbĭt anăn mtă kơ grăp hdră bhiăn, hdră mtrŭn brei mâo klei mprăp kjăp, ksiêm dlăng djăp ênŭm klei hmăi leh anăn iêo mkrum klei thâo mơ̆ng phung thơ̆ng kơ bruă, phung kreh knhâo, êpul êya anôk bruă duh mkra čiăng mđĭ hnơ̆ng tŭ jăk bruă mkŏ mjing hdră bhiăn.