Hruê mbruê 21/9, tui si mmông alŭ wăl, ti ƀuôn prŏng New York, Khua gĭt gai Đảng, Khua lăn čar Tô Lâm mbĭt hŏng Êpul bi ala gưl dlông Việt Nam bi tuôm hŏng Êpul phung thơ̆ng kơ bruă leh anăn phung hriăm gưl prŏng Việt Nam ti ala čar Mi mbĭt hŏng phung thơ̆ng kơ bruă, phung kreh knhâo mnuih Việt Nam dôk mă bruă ti ala čar Mi. Giăm 40 čô bi ala ngă bruă hlăm dŭm mta bruă klei thâo anak mnuih, klei čih pioh, êdeh phiơr amâo mâo pô mgăt, mkra mjing phần mềm, hdră êlan bruă knŭk kna, ngăn prăk, mtô bi hriăm leh anăn hdră bhiăn quốc tế nao hgŭm hlăm klei bi tuôm. Phung thơ̆ng kơ bruă ba mdah lu hdră msir kñăm mđĭ bruă klam mơ̆ng Việt Nam hlăm hdră ênoh yuôm klei thâo mĭn anak mnuih hlăm tar rŏng lăn, iêo jak prăk duh bi liê mơ̆ng ala tač êngao, mbĭt anăn bi mguôp ai dưi klei thâo mnuih Việt Nam ti ala tač êngao hŏng ala čar. Blŭ hrăm ti anôk anei, Khua gĭt gai Đảng, Khua lăn čar Tô Lâm bi myuôm dŭm klei blŭ klă klơ̆ng; mñă klei čiăng mjing klei găl čiăng kơ phung kreh knhâo ksiêm duah, mĭn mrâo leh anăn đru mguôp kơ lăn čar.

Khua gĭt gai Đảng, Khua lăn čar lač mnuih Việt Nam ti ala tač êngao jing kdrêč amâo bi ktlah ôh mơ̆ng êpul êya djuê ana Việt Nam leh anăn jing ai dưi hdră êlan yuôm bhăn.

Dŭm anôk bruă hlăm ala čar čiăng čŏng pô mđing hmư̆, iêo jak phung thơ̆ng kơ bruă nao hgŭm mơ̆ng hnưm hlăm hdră mkŏ mjing hdră êlan, bruă klam ksiêm hriăm leh anăn hdră mtô bi hriăm, mơ̆ng anăn mđĭ lar boh tŭ dưn hĭn ai dưi mnuih Việt Nam ti ala tač êngao.