Blŭ hrăm ti knăm anei, Khua gĭt gai Đảng, Khua lăn čar Tô Lâm mtă kơ sang hră lŏ dơ̆ng mlih mrâo, mđĭ hnơ̆ng tŭ jăk bruă mtô bi hriăm, mđĭ kyar mnuih mă bruă hnơ̆ng tŭ jăk leh anăn mjuăt bi hriăm mnuih mă bruă kơ lăn čar. Mbĭt anăn, mđĭ hĭn klei ksiêm hriăm kreh knhâo, mkăp klei hâo hưn đru bi leh klei bhiăn, mlih mrâo gru hmô đĭ kyar leh anăn mđĭ boh tŭ dưn ba yua dŭm ai dưi ala čar. Sang hră brei mđĭ hdră mtô bi hriăm lu mta bruă, ba yua kdrăp mrâo, mlih mrô, mguôp ksiêm hriăm hŏng boh sĭt leh anăn klei čiăng mđĭ kyar mơ̆ng alŭ wăl, anôk bruă duh mkra.

Khua gĭt gai Đảng, Khua lăn čar mñă, čiăng ksiêm hriăm mâo hnơ̆ng êlam, brei duh bi liê kjăp kơ êpul, klei čih pioh leh anăn dŭm êpul ksiêm hriăm ktang. Dlăng yuôm klei ksiêm hriăm phŭn, mguôp hŏng bruă mtô bi hriăm êdei kơ gưl prŏng; mtrŭt mđĭ klei ksiêm hriăm lu mta bruă leh anăn bi hgŭm hŏng dŭm anôk bruă kreh knhâo mâo klei thâo. Mtrŭt mđĭ klei bi trông mâo tur knơ̆ng, mpŭ kơ klei sĭt leh anăn mjing klei găl čiăng kơ phung kreh knhâo gĭr tui duah dŭm boh klei dleh. Găn 50 thŭn mkŏ mjing leh anăn đĭ kyar, truh ară anei Sang hră gưl prŏng bruă duh mkra ƀuôn prŏng Hồ Chí Minh mâo hnơ̆ng giăm 40.000 čô hđeh hriăm hră, hriăm bruă leh anăn phung ksiêm hriăm.