Ti anôk bi trông, Khua gĭt gai Đảng, Khua lăn čar Tô Lâm mñă klă Việt Nam dlăng yuôm klei mjĕ giăm hŏng Panama; bi mni kơ bruă klam mơ̆ng Panama hŏng anăn jing anôk phŭn mkŏ êlan êa ksĭ, êlan phiơr, bruă nah tluôn leh anăn ngăn prăk mơ̆ng krĭng wăl.

Khua gĭt gai Đảng, Khua lăn čar Tô Lâm bi êdah klei đăo knang dua ala čar srăng lŏ dơ̆ng ba yua tŭ dưn dŭm klei găl bi hgŭm hlăm dŭm mta bruă mnia mblei, bruă lŏ hma, bruă êa ksĭ, bruă êdeh phiơr, bruă nah tluôn, bruă bi mlih mrô, mtrŭt mđĭ klei bi hgŭm dua ala čar đĭ kyar hluê hdră ƀrư̆ hruê ƀrư̆ klă sĭt, tŭ dưn leh anăn hơĭt kjăp, kyua klei tŭ dưn mnuih ƀuôn sang dua ala čar.Khua mil čhil José Raúl Mulino mñă Panama dlăng Việt Nam jing ƀĭng hgŭm tal êlâo ti krĭng Asi - Pacifik, mprăp ngă kdrông mkŏ čiăng kơ Việt Nam pŏk mlar klei bi hgŭm hŏng dŭm ala čar Mi Latinh. Dua tĭng ăt bi tŭ ư mđĭ hdră bi hgŭm gang mkhư̆ phung ngă soh hluh knông lăn leh anăn bi hgŭm hlăm dŭm klei kƀĭn lu tĭng. Leh klei blŭ hrăm, dua čô khua gĭt gai ktuê dlăng knăm jao lu hră mơar bi hgŭm hlăm dŭm mta bruă dŭ mdiăng êa ksĭ, bruă lŏ hma, hiu čhưn ênguê, bruă êdeh phiơr, bruă ksiêm dlăng mnơ̆ng dhơ̆ng leh anăn bruă mtô bi hriăm.