Bi trông kơ klei bi hgŭm dua nah, dua čô khua gĭt gai ƀuh găn leh 55 thŭn mkŏ mjing klei bi mjĕ leh anăn bi hgŭm Việt Nam - Denmark ƀrư̆ hruê ƀrư̆ êlam hĭn, klă sĭt; dŭm bruă bi hgŭm ƀrư̆ hruê ƀrư̆ lu jơr, nao mbĭt hŏng dŭm klei mđing mđĭ kyar mơ̆ng dua ala čar.

Dua čô khua gĭt gai tŭ ư bi klă Klei hưn mthâo mbĭt mđĭ klei bi mjĕ Việt Nam - Denmark jing Ƀĭng hgŭm phŭn kluôm dhuôm, pŏk ênuk mrâo hlăm klei bi mjĕ dua nah, mjing tur knơ̆ng kđi čar leh anăn boh kdrŭt mrâo mtrŭt mđĭ klei bi hgŭm êlam, klă sĭt leh anăn tŭ dưn, kyua boh tŭ dưn sui thŭn mơ̆ng mnuih ƀuôn sang dua ala čar. Kơ klei bi hgŭm lu tĭng, dua čô khua gĭt gai bi tŭ ư kơ klei mĭn kơ dŭm boh klei dlông rŏng lăn leh anăn krĭng wăl; tŭ ư mđĭ hdră bi hgŭm, sa ai hdơ̆ng pô ti Êpul hgŭm lu ala čar leh anăn dŭm klei kƀĭn lu tĭng, mđĭ klei bi hgŭm ASEAN - EU đĭ kyar klă sĭt, tŭ dưn.