Ti anôk bi tuôm, Khua gĭt gai Đảng, Khua lăn čar đăo knang klei đĭ kyar hơĭt kjăp mơ̆ng Australia amâo djŏ knŏng ba klei mdrŏng sah kơ mnuih ƀuôn sang Australia, kơ klei bi mjĕ Việt Nam - Australia ƀiădah lŏ đru mguôp jăk kơ klei êđăp ênang, hơĭt kjăp leh anăn mdrŏng sah mơ̆ng krĭng wăl leh anăn tar rŏng lăn. Bi trông kơ klei bi mjĕ dua nah, Khua gĭt gai Đảng, Khua lăn čar Tô Lâm mñă Australia jing ƀĭng găp, ƀĭng hgŭm đăo knang, mâo lu klei tŭ dưn hdră êlan msĕ hŏng Việt Nam.

Việt Nam bi myuôm klei hrăm mbĭt leh anăn đru mơ̆ng Australia hlăm hdră mđĭ kyar lăn čar, mbĭt anăn čang hmăng ba klei bi mjĕ dua ala čar ƀrư̆ hruê ƀrư̆ êlam hĭn, klă sĭt leh anăn tŭ dưn. Kơ hdră bi hgŭm, Khua gĭt gai Đảng, Khua lăn čar Tô Lâm mtă kơ dua ala čar lŏ dơ̆ng bi kjăp klei đăo knang bruă kđi čar hluê hŏng klei bi trông gưl dlông leh anăn dŭm êlan bi hgŭm; pŏk mlar klei bi hgŭm bruă lĭng kahan - răng mgang klei êđăp ênang; mtrŭt mđĭ klei mnia mblei, duh bi liê, mđing truh kơ mta kñăm hnơ̆ng prăk bi mnia mblei dua nah 20 êklai USD leh anăn mđĭ ktang klei duh bi liê dua nah.