Khua gĭt gai Đảng, Khua lăn čar Tô Lâm brei thâo, Việt Nam mdưm mta kñăm jing ala čar mâo hnư hrui wĭt man dưn lu, bruă tuh tia mrâo mrang hlăm thŭn 2030 leh anăn ala čar đĭ kyar, hnư hrui wĭt lu hlăm thŭn 2045. Việt Nam bi mklă klei kreh knhâo mrâo mrang, mlih mrâo mbruă, bruă duh mkra kreh knhâo leh anăn bi mlih mtah jing dŭm boh kdrŭt yuôm bhăn; mbĭt anăn mă anak mnuih jing phŭn, rơ̆ng kơ mnuih ƀuôn sang dưi dưn boh tŭ mđĭ kyar mtăp mđơr, klă sĭt.

Bi mni kơ klei mjĕ giăm 55 thŭn plah wah dua ala čar, Khua gĭt gai Đảng, Khua lăn čar mtă brei mkŏ mjing tur knơ̆ng bi hgŭm hdră êlan leh anăn kluôm dhuôm hĭn, pŏk mlar klei bi hgŭm kơ bruă mnia mblei, duh bi liê, mtô bi hriăm, kreh knhâo kdrăp mrâo, pui kmlă leh anăn bi mlih mtah. Dua tĭng ăt čiăng mđĭ klei bi trông phung thơ̆ng kơ bruă, mjuăt bi hriăm mnuih mă bruă hnơ̆ng tŭ jăk leh anăn mtrŭt mđĭ klei ba jao kdrăp mrâo. Kơ klei đĭ kyar hơĭt kjăp, Việt Nam čang hmăng mbĭt hŏng Denmark mđĭ klei bi trông, bi hgŭm rơ̆ng klei êđăp ênang, klei êngiê êlan êa ksĭ djŏ hŏng klei bhiăn tar rŏng lăn, đru mkŏ mjing tar rŏng lăn êđăp ênang, mtăp mđơr leh anăn đĭ kyar hơĭt kjăp.