Klei bi kƀĭn bi kƀĭn phung bi ala gưl dlông, phung khua kiă kriê knŭk kna, phung khua kiă kriê dŭm anôk bruă êngĭt adiê ala čar, dŭm êpul bruă tar rŏng lăn, dŭm anôk bruă duh mkra, phung ksiêm duah kơ bruă êa ksĭ mơ̆ng hlăm brô 130 ala čar dlông rŏng lăn; leh anăn mkŏ hŏng tač êngao ISS. Klei bi kƀĭn mâo lu bruă bi trông hdră êlan, hưn mthâo klei găl bi mguôp hŏng tač êngao kơ kdrăp mrâo, ksiêm hriăm-mtô bi hriăm kơ bruă êdeh phiơr êngĭt adiê,  hlăm dŭm hdră êlan bi mguôp hŏng tač êngao mtrŭt mđĭ bruă duh mkra êlan phiơr, rơ̆ng klei êđăp ênang êlan phiơr hŏng klei blŭ hrăm leh anăn klei bi hgŭm, mđĭ klei kreh knhâo ksiêm duah bruă êngĭt adiê kyua êdei anăp anak mnuih.

 Blŭ pŏk Klei bi kƀĭn trông, Khua gĭt gai Đảng, Khua lăn čar Tô Lâm lač 5 mta phŭn kriê dlăng lu tĭng hŏng wăl êngĭt adiê, iêo mthưr amâo mâo arưp aram amâo dah ba yua klei bi blah, mdưm anak mnuih leh anăn Boh lăn ti krah.  Ñu ba mdah klei mĭn tĭng hluê anăn Việt Nam mbĭt hŏng Prăng, Êpul hgŭm lu ala čar, ASEAN leh anăn dŭm ƀĭng hgŭm ksiêm hriăm mkŏ mjing êpul êya "Wăl anôk kyua Klei đĭ kyar leh anăn Ai dưi mdrơ̆ng", mđing kơ klei kah mbha leh anăn ba yua klei hâo hưn kơ wăl anôk kyua klei đĭ kyar, mđĭ ai dưi rơ̆ng wăl anôk êđăp ênang, hơĭt kjăp leh anăn bi hgŭm ksiêm hriăm - mtô mjuăt - anôk bruă duh mkra - duh bi liê čiăng mđĭ kyar bruă duh mkra ala ƀuôn. Hdră bruă êlâo hĭn mđing kơ krĭng Ngŏ Dhŭng Asi mâo Việt Nam mprăp jing anôk bi hgŭm./.