Ti anôk tŭ drông, Khua gĭt gai Đảng, Khua lăn čar mñă klă Việt Nam dlăng yuôm nanao klei bi mjĕ hŏng ASEAN, dlăng kơ ASEAN jing gŏ sang jĕ giăm leh anăn jing ƀĭng găp jĕ giăm. Bi myuôm dŭm boh tŭ dưn mơ̆ng ASEAN hlăm wưng êgao, Khua gĭt gai Đảng, Khua lăn čar bi êdah klei đăo knang dŭm ala čar hgŭm srăng lŏ dơ̆ng krơ̆ng kjăp klei bi mguôp, mđĭ lar bruă klam phŭn, mkŏ mjing tŭ jing Êpul êya ASEAN 2045.

 Mbĭt anăn mñă klă, hlăm boh klei tar rŏng lăn dleh ktuê dlăng, dŭm ala čar ASEAN brei mđĭ hĭn klei đăo knang kđi čar, mđĭ klei thâo pô, pŏk mlar klei bi hgŭm bruă duh mkra, mnia mblei, duh bi liê, bi hrŏ klei kpleh mđĭ kyar plah wah dŭm ala čar hgŭm. Bi ala kơ phung bi ala ASEAN bi mklă srăng lŏ dơ̆ng bi hgŭm kjăp hŏng Việt Nam, đru mkŏ mjing Êpul êya ASEAN hgŭm mguôp, mbruă, mlih mrâo leh anăn mă mnuih ƀuôn sang jing phŭn.