Hlăm mmông tŭ drông, Khua gĭt gai Đảng, Khua Lăn čar Tô Lâm mñă ktang klei bi mguôp bruă lĭng kahan lŏ dơ̆ng jing kmeh gơ̆ng yuôm bhăn, đru ba klei mjĕ giăm dua ala čar nao êlam hĭn, klă klơ̆ng, đru mguôp hlăm klei êđăp ênang leh anăn mđĭ kyar alŭ wăl leh anăn tar rŏng lăn.

Khua gĭt gai Đảng, Khua Lăn čar Tô Lâm mñă klă Việt Nam dlăng kơ Mi jing sa hlăm dŭm ƀĭng hgŭm yuôm bhăn hdră êlan mrô 1, hmăng hmưi mbĭt hŏng Mi lŏ dơ̆ng hluê ngă tŭ dưn hdră bi mguôp hdră êlan kluôm dhuôm, ba klei mjĕ giăm dua ala čar đĭ kyar ƀrư̆ hruê ƀrư̆ klă klơ̆ng, kluôm êlam leh anăn tŭ dưn, kyua boh tŭ dưn mơ̆ng mnuih ƀuôn sang dua ala čar. Khua kiă kriê Paparo tŭ ư hŏng dŭm klei mñă klă klơ̆ng mơ̆ng Khua gĭt gai Đảng, Khua Lăn čar Tô Lâm kơ dŭm hdră êlan mtrŭt mđĭ klei mjĕ giăm dua ala čar đĭ ti hnơ̆ng mrâo, mbĭt anăn ƀuăn rơ̆ng Knơ̆ng gĭt gai lĭng kahan Pacific srăng lŏ dơ̆ng bi mguôp kjăp hŏng Việt Nam čiăng hluê ngă tŭ dưn dŭm hdră êlan bi mguôp ngă bruă, đru dŏng dŭm klei truh jŭ jhat, mđĭ ai dưi hluê ngă hdră bhiăn ti êa ksĭ.