Hlăm mmông mă bruă, Khua gĭt gai Đảng, Khua Lăn čar Tô Lâm mñă klă Đảng, Knŭk kna leh anăn mnuih ƀuôn sang Việt Nam dlăng yuôm klei bi mguôp hdră êlan hŏng Alêmang, dlăng kơ Alêmang jing ƀĭng hgŭm yuôm bhăn mrô 1 mơ̆ng Việt Nam ti Ơrôp.

Khua gĭt gai Đảng, Khua Lăn čar Tô Lâm bi êdah đa đa hdră tă bi mguôp plah wah dua ala čar hlăm wưng kơ anăp, hlăm anăn čiăng bi kjăp klei đăo knang bruă kđi čar hlăm klei bi trông êpul, bi tuôm gưl dlông leh anăn kdlưn hĭn jing dŭm mbah bruă Đảng, Knŭk kna leh anăn Bruă Kbĭn ala, ba yua Klei kuôl kă mnia mblei êngiê Việt Nam - EU (EVFTA) čiăng hnưm ba klei mnia mblei dua tĭng êgao 20 êklai USD, rơ̆ng kơ bruă dua ala čar jing anôk mnia mblei mrô 1 hdơ̆ng pô ti EU leh anăn ASEAN, mbĭt anăn amâo mâo mdei klei bi mguôp klă klơ̆ng, tŭ dưn hlăm dŭm mta bruă msĕ si klei kreh knhâo mrâo mrang, mlih mrâo mbruă, bi mlih mrô, bruă duh mkra mtah, bruă duh mkra dhar. K’iăng khua Bruă Kbĭn ala Bodo Ramelow tŭ ư hŏng Khua gĭt gai Đảng, Khua Lăn čar Tô Lâm kơ bruă mđĭ hĭn klei mjĕ mjuk mnuih ƀuôn sang, mjĕ mjuk dhar kreh, mđĭ lar êpul êya êbeh 200.000 mnuih Việt Nam ti Alemang ăt msĕ msĕ dŭm êbâo čô Việt Nam tuôm hriăm, mă bruă knuă ti Alemang čiăng bi kjăp tur knơ̆ng bi hgŭm leh anăn bi mguôp kjăp plah wah dua ala čar.