Drông pô bi ala Troy Rohrbaugh, khua kiă kriê dŭm anôk bruă hlăm tar rŏng lăn mơ̆ng knơ̆ng bruă JPMorgan Chase, Khua gĭt gai Đảng, Khua lăn čar Tô Lâm bi myuôm dŭm klei đru mguôp mơ̆ng knơ̆ng bruă hlăm klei kăp kčĕ, đru kơ knŭk kna leh anăn anôk bruă duh mkra Việt Nam iêo mkrum prăk ala tač êngao. Khua gĭt gai Đảng, Khua lăn čar mtă kơ JPMorgan Chase lŏ dơ̆ng đru kơ Việt Nam dưi ba yua tŭ dưn dŭm phŭn mkăp prăk ala tač êngao, kah mbha klei hriăm kơ bruă mđĭ kyar anôk mnia mblei ngăn prăk, kriê dlăng nư lehanăn mkăp prăk kơ ala tač êngao.

Lŏ blŭ hrăm hŏng Robert Thomson, K'iăng khua gưl dlông Êpul grup Visa, Khua gĭt gai Đảng, Khua lăn čar Tô Lâm bi myuôm êbeh 30 thŭn Visa hrăm mbĭt hŏng anôk mnia mblei Việt Nam. Dua tĭng bi trông kơ mtrŭt mđĭ bruă tĭng tla mrô, mlih mrô, mđĭ kyar bruă duh mkra mrô lehanăn đru kơ anôk bruă duh mkra điêt lehanăn man dưn. Khua gĭt gai Đảng, Khua lăn čar Tô Lâm čang hmăng kơ dŭm êpul grŭp lŏ dơ̆ng hrăm mbĭt, đru mguôp iêo jak prăk duh bi liê hnơ̆ng tŭ jăk, mtrŭt mđĭ klei mlih mrâo hŏng klei mbruă leh anăn bi mlih mrô ti Việt Nam.