Blŭ gĭt gai hlăm mmông mă bruă, Khua gĭt gai Đảng, Khua lăn čar Tô Lâm mtă kơ Anôk bruă ksiêm hriăm kơ bruă kđi čar ala čar Hồ Chí Minh brei ksiêm dlăng bi nik boh tŭ dưn, dlăng klă dŭm klei êdu kƀah lehanăn thâo klă dŭm klei čiăng mơ̆ng Anôk bruă, mbĭt anăn brei bi mklă kơhưm, bruă klam lehanăn klei čiăng mđĭ kyar Anôk bruă hlăm wưng mrâo. Khua gĭt gai Đảng, Khua lăn čar mtă kơ Sang hră ksiêm hriăm brei mlih mrâo mđrăm mbĭt hdră ngă bruă, mjing klei bi mlih klă kơ hnơ̆ng tŭ jăk leh anăn boh tŭ dưn.

Hlăm ai tiê anăn Khua gĭt gai Đảng, Khua lăn čar mâo 5 klei mtă hŏng Sang hră ksiêm hriăm; Hlăm anăn brei mđĭ hnơ̆ng ksiêm hriăm klei hlak mblang, ksiêm dlăng boh sĭt, đru kčĕ hdră êlan leh anăn răng mgang tur knơ̆ng klei mĭn mơ̆ng Đảng; Mbĭt anăn brei mlih mrâo phŭn, kluôm ênŭm hdră mtô bi hriăm, mjuăt bi hriăm hluê hdră mđĭ kyar mnơ̆ng dhơ̆ng leh anăn ai dưi knuă druh. Khua gĭt gai Đảng, Khua lăn čar mñă klă Sang hră brei jing anôk grăp čô knuă druh tơdah đuĕ mơ̆ng sang hră Đảng brei kjăp hĭn kơ knhuah, klă mngač hĭn kơ klei mĭn, kdlưn hĭn kơ bruă klam, ngă bruă tŭ dưn hĭn kyua Đảng, kyua lăn čar, kyua mnuih ƀuôn sang.