Anei jing gưl tal êlâo khua gĭt gai Đảng Cộng sản Việt Nam nao čuă klă sĭt Canada yap mơ̆ng leh dua ala čar mkŏ mjing klei mjĕ giăm thŭn 1973. Leh êbeh 50 thŭn mkŏ mjing klei mjĕ giăm lehanăn giăm 10 thŭn pŏk ngă hdră bi hgŭm kluôm, Việt Nam lehanăn Canada mkŏ mjing leh tur knơ̆ng klei mjĕ giăm ƀrư̆ hruê ƀrư̆ kjăp. Dua ala čar mâo lu klei găl bi đru msĕ: Việt Nam dôk mŭt hlăm ênuk đĭ kyar mrâo, bi mklă klei kreh knhâo - kdrăp mrâo, mlih mrâo hŏng klei mbruă, mlih mrô lehanăn ñŭ kma hŏng ala tač êngao êlam; Canada dôk mtrŭt mđĭ klei bi hgŭm lu tĭng lehanăn mđĭ klei bi hgŭm hŏng krĭng India - Pacific.

Gưl hiu čhưn tal anei mơ̆ng Khua gĭt gai Đảng, Khua lăn čar Tô Lâm srăng mjing boh kdrŭt kđi čar ktang, ba klei bi mjĕ Việt Nam - Canada đĭ kyar klă sĭt, bi knar leh anăn tŭ dưn hĭn, năng hŏng klei găl, klei mâo leh anăn klei čiăng mơ̆ng dua ala čar. Mbĭt anăn, gưl hiu čhưn ăt srăng pŏk sa wưng đĭ kyar hdră êlan leh anăn kluôm dhuôm hĭn plah wah dua ala čar, đru mguôp jăk kơ klei êđăp ênang, hơĭt kjăp ti krĭng wăl leh anăn dlông rŏng lăn../.