Hluê hdră ƀuôn prŏng kčah, gưl IV čiăng đĭ êbeh 13% čiăng hluê ngă hdră kñăm đĭ kyar thŭn 2026. Khua gĭt gai Đảng, Khua lăn čar lač anei jing klei čiăng êdi, brei bi mklă klei dưi đru mguôp mơ̆ng grăp dhar bruă, grăp hdră bruă leh anăn grăp êpul anôk bruă duh mkra. Hlăm boh klei tar rŏng lăn bi mlih pral, ƀuôn prŏng brei mđĭ klei thâo hưn mdah, čŏng pô mkŏ mjing hdră mdrơ̆ng, mđrĭng hŏng bruă krơ̆ng kjăp dŭm mta kñăm wưng sui kơ hnơ̆ng tŭ jăk, kdrăp mrâo, mnuih mă bruă leh anăn wăl hdĭp mda.

Ñu mtă kơ Anôk dlăng bruă Đảng ƀuôn prŏng lŏ dơ̆ng mlih mrâo klei mĭn čŏng pô, mđĭ klei thâo hluê ngă, msir mgaih bruă truh kơ boh tŭ knhal tuč. Ba yua tŭ dưn klei dưi mơ̆ng Hdră bhiăn mđĭ kyar ƀuôn prŏng čiăng bi hrŏ klei ngă hră mơar, bi hrŏ ênoh bi liê kơ mnuih ƀuôn sang leh anăn anôk bruă duh mkra. Ksiêm dlăng kluôm bruă klam êmưt hluê ngă, bi mklă klei đua klam, bi mklă hruê mmông msir mgaih, anôk kpăk mơ̆ng grăp hră mơar. Krơ̆ng kjăp anôk bruă knŭk kna dua gưl, mđing kơ phŭn mkăp ngăn prăk kơ să, ƀuôn hgŭm klei ktrŏ prŏng; tui duah jih hnơ̆ng klei mrâo mrang mrô čiăng bi hrŏ klei ktrŏ kơ mnuih ƀuôn sang, anôk bruă duh mkra. Tĭng dlăng phung knuă druh hŏng mnơ̆ng dhơ̆ng klă sĭt leh anăn klei sa ai mơ̆ng yang ƀuôn, bi mlih mtam phung knuă druh amâo mâo djŏ hŏng klei čiăng.