Hdră mjuăt bi hriăm, lŏ bi mrâo klei thâo mkŏ mjing mơ̆ng hruê 17/8/2026 hŏng klei nao hgŭm mơ̆ng 63 čô hriăm jing phung Khua hlăm Anôk bruă Đảng gưl dlông. Hdră kñăm lŏ mlih mrâo dŭm mta klei hlak mblang, boh sĭt mrâo hĭn, mđĭ klei thâo gĭt gai, kriê dlăng kơ êpul knuă druh gưl knơ̆ng mơ̆ng Đảng hlăm wưng mrâo. Khua gĭt gai Đảng, Khua lăn čar Tô Lâm lač klă, adŭ mjuăt bi hriăm dưi mkŏ mjing hlăm thŭn tal êlâo pŏk ngă Hdră mtrŭn Klei bi kƀĭn XIV mơ̆ng Đảng.

Bruă klam bi mklă ară anei jing mkŏ mjing hluê ngă: bi mlih hdră êlan jing hdră bruă dưi ngă, bruă ngă hrăm mbĭt leh anăn boh tŭ klă klơ̆ng; ngă kơ klei mĭn mơ̆ng Đảng bi mlih jing klei đĭ kyar mơ̆ng lăn čar leh anăn klei hdĭp jăk siam hĭn mơ̆ng Mnuih ƀuôn sang. Khua gĭt gai Đảng, Khua lăn čar mñă klă, grăp čô hriăm amâo djŏ knŏng gĭt gai sa dhar bruă, anôk bruă amâodah alŭ wăl, ƀiădah lŏ jing mnuih hlăm Anôk dlăng bruă Đảng gưl dlông- anôk bruă gĭt gai prŏng hĭn mơ̆ng Đảng plah wah dua Klei bi kƀĭn. Kyua anăn, brei mĭn ti hnơ̆ng kluôm ala, ngă bruă kyua klei tŭ dưn mbĭt, hrăm mbĭt hŏng Gưl dlông đua klam ti anăp Đảng, ti anăp Mnuih ƀuôn sang kơ dŭm klei bi mklă yuôm bhăn leh anăn êdei anăp lăn čar.