Mđup brei anăn knăl Pô jhŏng ktang lĭng kahan yang ƀuôn kơ lĭng kahan alŭ wăl 2 lehanăn blŭ hrăm ti knăm anei, Khua gĭt gai Đảng, Khua lăn čar Tô Lâm mñă klă, Yŭ Dưr jing krĭng lăn bŏ hŏng knhuah gru khăp kơ ala čar, cách mạng, mâo anôk yuôm bhăn hlăm êlan Dưr leh anăn Yŭ Dưr mơ̆ng Ala čar. Khua gĭt gai Đảng, Khua lăn čar mtă kơ Êpul lĭng kahan alŭ wăl 2 mđing mkŏ mjing êpul lĭng kahan alŭ wăl cách mạng, knhăk, thâo, mrâo mrang; mkŏ mjing êpul lĭng kahan mprăp êmiêt, kahan ƀuôn kjăp ktang, lar ƀar.

Hlăm wưng kơ anăp, Khua gĭt gai Đảng, Khua lăn čar đăo knang phung knuă druh, lĭng kahan êpul lĭng kahan alŭ wăl 2 srăng krơ̆ng kjăp klei ƀuăn rơ̆ng hŏng Đảng, hŏng mnuih ƀuôn sang, mbĭt hŏng mnuih ƀuôn sang dŭm djuê ana răng mgang kjăp grăp kdrêč lăn yuôm bhăn mơ̆ng Ala čar, mkŏ mjing Yŭ Dưr ƀrư̆ hruê ƀrư̆ mdrŏng siam, čiăng kơ grăp boh ƀuôn hĭt ênang, grăp gŏ sang hĭt ênang, yâo mơak.