Hlăm klei bi tuôm, Khua gĭt gai Đảng, Khua lăn čar lač kơ 4 bruă phŭn, anăn jing: Brei bi thâo săng djŏ kơ klei bhiăn mơ̆ng hdră čuăl mkă leh anăn bruă klam phung knuă druh hlăm hdră čuăl mkă;  Brei mprăp klei thâo klă sĭt mơ̆ng êpul knuă druh hlăm Anôk kriê dlăng hlăm wưng mrâo. Hnơ̆ng mkă knhal tuč jing mnơ̆ng dhơ̆ng, boh tŭ, klei hmăi, kơhưm leh anăn hnơ̆ng duh kơ mnuih ƀuôn sang; Brei mlih mrâo bruă kriê dlăng, hriăm mjuăt leh anăn ba yua knuă druh leh čuăl mkă. Ñu mtă kơ bruă mjing wăl anôk čiăng kơ phung knuă druh jhŏng mĭn, jhŏng ngă, jhŏng đua klam.

Khua gĭt gai Đảng, Khua lăn čar Tô Lâm lač klă bruă mprăp êpul knuă druh hruê anei jing mprăp klei thâo gĭt gai mơ̆ng Đảng kơ dŭm ktuê êlan đĭ kyar mrâo. Klei čuăl mkă jing hdră mprăp, mjuăt bi hriăm, ksiêm dlăng leh anăn hrŏng ruah; amâo djŏ mprăp "anôk" kơ phung knuă druh gĭt gai. Khua gĭt gai Đảng, Khua lăn čar mñă klă: bruă klam jing klei mbha mơ̆ng êpul êya; klei dưi jing klei jao čiăng ngă bruă kơ lăn čar leh anăn Mnuih ƀuôn sang; klei mpŭ, kơhưm leh anăn gru kruăk klei duh myơr kyua grăp čô mkŏ mjing. Klei jăk leh anăn klei thâo mơ̆ng phung knuă druh brei dưi ksiêm dlăng hlăm boh sĭt, hŏng hdră ba yua klei dưi, hŏng boh tŭ bruă knuă leh anăn hŏng klei đăo knang mơ̆ng phung knuă druh, đảng viên leh anăn Mnuih ƀuôn sang./.