Klei kƀĭn trông hŏng klei nao hgŭm mơ̆ng phung bi ala dŭm Dhar bruă, Phŭn, dhar bruă, Knơ̆ng bruă, sang hră, alŭ wăl mâo êa ksĭ mkŏ mjing hlăm boh klei Knŭk kna mrâo ba mdah Hdră mtrŭn mrô 218 kơ Hdră ngă bruă hluê ngă Hdră mtrŭn mrô 20 mơ̆ng Anôk kriê dlăng bruă Đảng gưl dlông tal XIV kơ mkŏ mjing, mđĭ kyar Việt Nam jing ala čar êa ksĭ ktang. Kreh knhâo, kdrăp mrâo, mlih mrâo mbruă leh anăn mlih mrô amâo djŏ knŏng dưi bi mklă đru ôh ƀiădah dưi bi mklă jing sa hlăm dŭm tur knơ̆ng čiăng mđĭ ai dưi ala čar kơ êa ksĭ.

Trần Tuấn Anh, K'iăng khua anôk bruă ksiêm hriăm kơ klei kreh knhâo leh anăn kdrăp mrâo Việt Nam lač, sa ala čar êa ksĭ ktang amâo djŏ knŏng mâo lu kdrŭn ksĭ, kŭm păn, hô̆ mran amâodah hnơ̆ng bruă duh mkra êa ksĭ prŏng, ƀiădah brei thâo săng, đăo knăl leh anăn kriê dlăng êa ksĭ, ba yua kjăp mnơ̆ng dhơ̆ng leh anăn ngă phŭn dŭm kdrăp mrâo êa ksĭ.

“Čiăng mkŏ mjing sa wăl anôk ksiêm hriăm kơ êa ksĭ ala čar klă sĭt, sa ala čar êa ksĭ ktang amâo mâo djŏ knŏng jưh knang kơ sa knơ̆ng bruă ksiêm hriăm amâodah sa Phŭn, dhar bruă. Wăl anôk ksiêm hriăm kơ êa ksĭ mâo klei hgŭm mơ̆ng dŭm knơ̆ng bruă ksiêm hriăm, dŭm sang hră gưl prŏng, dŭm Phŭn, dhar bruă kriê dlăng knŭk kna, dŭm êpul êya ngă bruă hlăm êa ksĭ, dŭm alŭ wăl ktuê hang ksĭ, dŭm anôk bruă duh mkra kơ êa ksĭ leh anăn êpul êya ƀĭng hgŭm".

Jing alŭ wăl mâo klei găl mdê hjăn kơ êa ksĭ, Khánh Hòa mâo giăm 490 km hang ksĭ, êbeh 200 boh plao ksĭ, dŭm krĭng êa ksĭ êlam Vân Phong, Nha Trang, Cam Ranh leh anăn krĭng knơ̆ng bruă Trường Sa, mbĭt hŏng hdră bruă ksiêm hriăm, mtô bi hriăm thơ̆ng kơ bruă. Nguyễn Thanh Hà, K’iăng Khua Knơ̆ng bruă sang čư̆ êa čar Khánh Hoà brei thâo, hluê ngă Hdră mtrŭn 20 čiăng bi mlih ktang mơ̆ng bruă ba yua êa ksĭ nao kơ bruă kriê dlăng êa ksĭ ênuk mrâo, hluê hŏng klei thâo leh anăn kdrăp mrâo. Khánh Hòa akâo kơ gưl dlông mđing duh bi liê dŭm hdră bruă ksiêm duah yua mbĭt gưl ala čar msĕ si kŭm păn ksiêm duah êa ksĭ êlam, anôk ksiêm duah phŭn, êlan klei mrâo mrang thâo mĭn bi mguôp; mbĭt anăn ksiêm dlăng ba Anôk ksiêm duah ala čar kơ kdrăp mrâo êa ksĭ ti Khánh Hòa hlăm hdră čuăl mkă dŭm anôk bruă, anôk ksiêm duah phŭn ala čar kơ kdrăp mrâo hdră êlan.

“Čar Khánh Hòa ƀuăn rơ̆ng pioh ai dưi kñăm tal êlâo hĭn, mprăp ênŭm anôk ala, klei bhiăn, anôk bruă nah gŭ ăt msĕ mơh bi hgŭm kjăp hŏng dŭm anôk bruă, sang hră ti alŭ wăl čiăng drông, pŏk ngă tŭ dưn dŭm hdră ksiêm hriăm, ba jao kdrăp mrâo.”

Khua phŭn bruă kreh knhâo leh anăn kdrăp mrâo Vũ Hải Quân bi mklă, Hdră mtrŭn 20 mdưm leh knhuang bi mlih phŭn kơ bruă kreh knhâo, kdrăp mrâo êa ksĭ. Phŭn bruă kreh knhâo leh anăn kdrăp mrâo srăng đru kčĕ kơ Knŭk kna hdră pŏk ngă Hdră mtrŭn 20, mđing ruah dŭm bruă kreh knhâo, kdrăp mrâo, mlih mrâo hŏng klei knhêč lehanăn mlih mrô êa ksĭ phŭn wưng thŭn 2026-2030.

“Phŭn bruă kreh knhâo- kdrăp mrâo srăng đru kčĕ kơ knŭk kna bi klă hdră pŏk ngă Hdră mtrŭn 20. Ñu klă sĭt jing tŭ dưn, ñu mâo lu mta bruă êa ksĭ prŏng, ñu mđĭ ai msĕ snăn hlăm klei kreh knhâo kdrăp mrâo snăn ñu ăt prŏng mơh. Phŭn bruă kreh knhâo, kdrăp mrâo srăng gĭr dăp tui si klei kčah čiăng dưi pŏk ngă hŏng klei tŭ dưn. Mâo dŭm mta bruă drei srăng ngă sui, ngă hŏng klei kjăp ƀiădah mâo dŭm mta bruă dưi duh bi liê čiăng ba wĭt boh tŭ dưn.”